عزیزو نہ پوچھو کہاں رہ گیا

عزیزو نہ پوچھو کہاں رہ گیا

جہاں جی لگا بس وہاں رہ گیا

جو رہنا تھا برق تپاں رہ گیا

قفس جل گیا آشیاں رہ گیا

ہوا مندمل زخم تیر نظر

مگر دل پہ اس کا نشاں رہ گیا

گیا آشیانہ زمانہ ہوا

فقط اب غم آشیاں رہ گیا

یہ دونوں بھی منزل پہ پہنچے مگر

غبار اڑ گیا کارواں رہ گیا

جہاں کارواں کا ہوا تھا قیام

وہاں کارواں کا نشاں رہ گیا

ادھر وحشت دل مجھے لے اڑی

ادھر ہوش دامن کشاں رہ گیا

کہو بندہ پرور ہو کس سوچ میں

ابھی کیا کوئی امتحاں رہ گیا

ہر اک چیز اے قدرؔ آئی گئی

غم عشق ہی جاوداں رہ گیا