بہ انداز دگر اب عہد و پیماں ہوتے جاتے ہیں

بہ انداز دگر اب عہد و پیماں ہوتے جاتے ہیں

کسی عنواں سہی جینے کے ساماں ہوتے جاتے ہیں

خزاں کے دور کو جو مستقل سمجھے غلط سمجھے

بہار آئی گلستاں پھر گلستاں ہوتے جاتے ہیں

جنہیں تھی موج بوئے گل نوید چاک دامانی

وہ دیوانے بھی مانوس بہاراں ہوتے جاتے ہیں

بجا تھا گر مجھے اپنی محبت پر بھروسہ تھا

کہ اس جانب سے بھی اب عہد و پیماں ہوتے جاتے ہیں

کہو اے بوم و شپر اب دلوں پر کیا گزرتی ہے

کہ آثار سحر کچھ کچھ نمایاں ہوتے جاتے ہیں