ba-chaman ab wo kiya chahe hai mai-nosh guzar

ba-chaman ab vo kiyā chāhe hai mai-nosh guzār

jald ai paik-e-sabā gul ke ye kar gosh-guzār

nahīñ ma.alūm kahāñ jaate haiñ juuñ nashsha-e-mai

jidhar in rozoñ meñ ham karte haiñ mad.hosh guzār

bazm meñ mujh ko jo dekhā to ye jhuñjhlā ke kahā

aisī mahfil meñ kare hai mirī pā-posh guzār

sar-nigūñ kūcha-e-rusvā.ī meñ haiñ aaj talak

sau ḳharābī se jo is dar pe kiyā dosh guzār

āshiq us parda-nashīñ ke haiñ ki gar sāmne se

kabhī guzre hai to kartā hai vo rū-posh guzār

chand roza hai ye mai-ḳhāna-e-hastī yaañ to

umr ġhaflat meñ na ai be-ḳhirad-o-hosh guzār

aa phañsā ishva-o-andāz-o-adā meñ yuuñ dil

rahzanoñ meñ kare juuñ rāh-farāmosh guzār

ham-safar haiñ to ye hasrat hai ki kiije kosoñ

ik savārī meñ hue us se ham-āġhosh guzār

qadr-dāñ koī suḳhan kā na rahā ai 'jur.at'

kunj-e-tanhā.ī meñ auqāt tū ḳhāmosh guzār

ba-chaman ab wo kiya chahe hai mai-nosh guzar

jald ai paik-e-saba gul ke ye kar gosh-guzar

nahin malum kahan jate hain jun nashsha-e-mai

jidhar in rozon mein hum karte hain madhosh guzar

bazm mein mujh ko jo dekha to ye jhunjhla ke kaha

aisi mahfil mein kare hai meri pa-posh guzar

sar-nigun kucha-e-ruswai mein hain aaj talak

sau KHarabi se jo is dar pe kiya dosh guzar

aashiq us parda-nashin ke hain ki gar samne se

kabhi guzre hai to karta hai wo ru-posh guzar

chand roza hai ye mai-KHana-e-hasti yan to

umr ghaflat mein na ai be-KHirad-o-hosh guzar

aa phansa ishwa-o-andaz-o-ada mein yun dil

rahzanon mein kare jun rah-faramosh guzar

ham-safar hain to ye hasrat hai ki kije koson

ek sawari mein hue us se ham-aghosh guzar

qadr-dan koi suKHan ka na raha ai 'jurat'

kunj-e-tanhai mein auqat tu KHamosh guzar