ba-faiz-e-ishq har ja sainkaDon diwane milte hain

ba-faiz-e-ishq har jā saiñkaḌoñ dīvāne milte haiñ

jahāñ bhī sham.a raushan ho vahīñ parvāne milte haiñ

nahīñ mauqūf kuchh sahrā-navardī par hī ai hamdam

jahāñ hote haiñ farzāne vahīñ dīvāne milte haiñ

ye dil kī bastiyāñ ābād haiñ jo husn-e-fitrat se

inhī ābādiyoñ ke qalb meñ vīrāne milte haiñ

batā de kaash ye koī haram ke jaane vāloñ ko

haram kī raah meñ bhī anginat but-ḳhāne milte haiñ

hudūd-e-ishq meñ hī āfiyat hai ye samajh liije

hudūd-e-ishq ke us paar to vīrāne milte haiñ

nahīñ laatā huuñ andeshoñ ko ḳhātir meñ kabhī hargiz

vahīñ jaatā huuñ uḌ kar maiñ jahāñ kuchh daane milte haiñ

jahāñ ziddain yakjā hoñ vahī duniyā hai ai 'ḳhāvar'

jahāñ hoñ jāne-pahchāne vahīñ begāne milte haiñ

ba-faiz-e-ishq har ja sainkaDon diwane milte hain

jahan bhi shama raushan ho wahin parwane milte hain

nahin mauquf kuchh sahra-nawardi par hi ai hamdam

jahan hote hain farzane wahin diwane milte hain

ye dil ki bastiyan aabaad hain jo husn-e-fitrat se

inhi aabaadiyon ke qalb mein virane milte hain

bata de kash ye koi haram ke jaane walon ko

haram ki rah mein bhi anginat but-KHane milte hain

hudud-e-ishq mein hi aafiyat hai ye samajh lije

hudud-e-ishq ke us par to virane milte hain

nahin lata hun andeshon ko KHatir mein kabhi hargiz

wahin jata hun uD kar main jahan kuchh dane milte hain

jahan ziddain yakja hon wahi duniya hai ai 'KHawar'

jahan hon jaane-pahchane wahin begane milte hain