ba-fart-e-shauq har gul mein tere ruKH ki ziya samjhe

ba-fart-e-shauq har gul meñ tire ruḳh kī ziyā samjhe

agar chaTkā koī ġhuncha to ham terī sadā samjhe

hameñ dekho ki kab ham ne binā-e-āshiyāñ Daalī

muḳhālif apne jab saare gulistāñ kī fazā samjhe

bil-āḳhir aaj merā zabt-e-ulfat rañg le aayā

mujhe hī jāñnisār-e-ishq-o-jāñbāz-e-vafā samjhe

hamāre paas aayā hai mo.attar jab koī jhoñkā

use ham be-takalluf tere dāman kī havā samjhe

hameñ le aayā is manzil meñ tere ishq kā jazba

ki ham har ek zarra maz.har-e-shān-e-ḳhudā samjhe

samajh se duur hai jāñ-dādgān-e-ishq kī manzil

fanā kī god meñ sarmāya-e-rāz-e-baqā samjhe

na hogā koī ham sā rahrav-e-rāh-e-vafā 'jauhar'

ham is manzil kī har aafat ko sāmān-e-baqā samjhe

ba-fart-e-shauq har gul mein tere ruKH ki ziya samjhe

agar chaTka koi ghuncha to hum teri sada samjhe

hamein dekho ki kab hum ne bina-e-ashiyan Dali

muKHalif apne jab sare gulistan ki faza samjhe

bil-aKHir aaj mera zabt-e-ulfat rang le aaya

mujhe hi jaannisar-e-ishq-o-jaanbaz-e-wafa samjhe

hamare pas aaya hai moattar jab koi jhonka

use hum be-takalluf tere daman ki hawa samjhe

hamein le aaya is manzil mein tere ishq ka jazba

ki hum har ek zarra mazhar-e-shan-e-KHuda samjhe

samajh se dur hai jaan-dadgan-e-ishq ki manzil

fana ki god mein sarmaya-e-raaz-e-baqa samjhe

na hoga koi hum sa rahraw-e-rah-e-wafa 'jauhar'

hum is manzil ki har aafat ko saman-e-baqa samjhe