ba-juz andoh-o-gham kya aur hijr-e-yar mein dekha

ba-juz andoh-o-ġham kyā aur hijr-e-yār meñ dekhā

yahī paayā yahī har kūcha-o-bāzār meñ dekhā

jamāl-e-haq to husn-e-qāmat-e-dildār meñ dekhā

jalāl-e-ḳhāliq-e-akbar nigāh-e-yār meñ dekhā

idhar dil se chale aur us taraf bahne lage aañsū

ye tūfāñ dard-o-ġham kā chashm-e-dariyā-bār meñ dekhā

namak chhiḌkā ba-jā.e marham-e-kāfūr qātil ne

jarāhat kā mazā kyā zaḳhm-e-dāman-dār meñ dekhā

kisī pahlū kisī karvaT na chain aaya na niiñd aa.ī

ye andāz-e-sitam tīr-e-jigar-afgār meñ dekhā

kaleja kyoñ na phaT jaa.e hamārā is musībat par

ki apne laḳht-e-dil kā dīda-e-ḳhūñbār meñ dekhā

abas tum DhūñDte ho dīda-e-bīmār meñ aañsū

lahū kuchh bhī mire jism-e-nahīf-o-zār meñ dekhā

rahe aañsū na jab baaqī to TukḌe dil ke bah nikle

ġhazab kā ye tamavvuj dīda-e-ḳhūñbār meñ dekhā

nuqūsh-o-ma’anī-e-qur.āñ tarīq-e-kāfir-o-momin

ye sab kuchh aap ke ḳhāl-o-ḳhat-e-ruḳhsār meñ dekhā

gire ham misl-e-mūsā vādī-e-ulfat meñ ġhash khākar

jamāl-e-haq jo husn-e-qāmat-e-dildār meñ dekhā

ajab kyā hai bahār aa.ī ho phir sehn-e-gulistāñ meñ

ki ham ne phuul ai bulbul tirī minqār meñ dekhā

sañbhalnā ho gayā dushvār mujh ko aur ai 'hāmid'

jo dil ko nok-e-teġh-e-abrū-e-ḳhummār meñ dekhā

ba-juz andoh-o-gham kya aur hijr-e-yar mein dekha

yahi paya yahi har kucha-o-bazar mein dekha

jamal-e-haq to husn-e-qamat-e-dildar mein dekha

jalal-e-KHaliq-e-akbar nigah-e-yar mein dekha

idhar dil se chale aur us taraf bahne lage aansu

ye tufan dard-o-gham ka chashm-e-dariya-bar mein dekha

namak chhiDka ba-jae marham-e-kafur qatil ne

jarahat ka maza kya zaKHm-e-daman-dar mein dekha

kisi pahlu kisi karwaT na chain aaya na nind aai

ye andaz-e-sitam tir-e-jigar-afgar mein dekha

kaleja kyon na phaT jae hamara is musibat par

ki apne laKHt-e-dil ka dida-e-KHunbar mein dekha

abas tum DhunDte ho dida-e-bimar mein aansu

lahu kuchh bhi mere jism-e-nahif-o-zar mein dekha

rahe aansu na jab baqi to TukDe dil ke bah nikle

ghazab ka ye tamawwuj dida-e-KHunbar mein dekha

nuqush-o-ma’ani-e-quran tariq-e-kafir-o-momin

ye sab kuchh aap ke KHal-o-KHat-e-ruKHsar mein dekha

gire hum misl-e-musa wadi-e-ulfat mein ghash khakar

jamal-e-haq jo husn-e-qamat-e-dildar mein dekha

ajab kya hai bahaar aai ho phir sehn-e-gulistan mein

ki hum ne phul ai bulbul teri minqar mein dekha

sanbhalna ho gaya dushwar mujh ko aur ai 'hamid'

jo dil ko nok-e-tegh-e-abru-e-KHummar mein dekha