ba-pas-e-ehtiyat-e-arzu ye bar-ha hua

ba-pās-e-ehtiyāt-e-ārzū ye bār-hā huā

nikal gayā qarīb se vo haal pūchhtā huā

hijāb-e-ruḳh lahak uThā agar bahut ḳhafā huā

jabhī to ham se pai-ba-pai qusūr-e-mudda.ā huā

shikāyat-e-adm-e-tavajjohī bajā sahī magar

nasīb-e-ahl-e-anjuman nahīñ hai dil dukhā huā

amīn-e-rāz-e-ġham nahīñ haiñ dar-ḳhor-e-sitam nahīñ

palaT rahe haiñ aap hī pe aap kā kahā huā

uTheñgī merī vaj.h se jab aap par bhī uñgliyāñ

kaheñge phir to aap bhī ki vāqa.ī burā huā

hujūm-e-mā-sivā se bach ke manzil-e-murād tak

pahuñch gayā huuñ rahzanoñ se raah pūchhtā huā

kabhī kabhī ḳhulūs-e-be-ta.alluqī bhī chāhiye

nigāh maiñ ne pher lī to us kā sāmnā huā

zamāna-e-ubūr-e-inqalāb kī bhī umr hai

na shāḳh-e-āshiyāñ rahī na āshiyāñ jalā huā

nahīñ kuchh is se muḳhtalif giroh-e-bazm-e-raqs-o-mai

nikal gayā jo gulsitāñ meñ ḳhvāb dekhtā huā

ye kāvish-e-umīd-o-bīm bhī hai lazzat-āfrīñ

nazar udhar jamī huī naqāb-e-ruḳh uThā huā

ġhalat-bayāniyoñ ke ahd-e-nau meñ 'shād' aarfī

mirā kamāl-e-fan ye hai ki sirf mājrā huā

ba-pas-e-ehtiyat-e-arzu ye bar-ha hua

nikal gaya qarib se wo haal puchhta hua

hijab-e-ruKH lahak uTha agar bahut KHafa hua

jabhi to hum se pai-ba-pai qusur-e-muddaa hua

shikayat-e-adm-e-tawajjohi baja sahi magar

nasib-e-ahl-e-anjuman nahin hai dil dukha hua

amin-e-raaz-e-gham nahin hain dar-KHor-e-sitam nahin

palaT rahe hain aap hi pe aap ka kaha hua

uThengi meri wajh se jab aap par bhi ungliyan

kahenge phir to aap bhi ki waqai bura hua

hujum-e-ma-siwa se bach ke manzil-e-murad tak

pahunch gaya hun rahzanon se rah puchhta hua

kabhi kabhi KHulus-e-be-talluqi bhi chahiye

nigah main ne pher li to us ka samna hua

zamana-e-ubur-e-inqalab ki bhi umr hai

na shaKH-e-ashiyan rahi na aashiyan jala hua

nahin kuchh is se muKHtalif giroh-e-bazm-e-raqs-o-mai

nikal gaya jo gulsitan mein KHwab dekhta hua

ye kawish-e-umid-o-bim bhi hai lazzat-afrin

nazar udhar jami hui naqab-e-ruKH uTha hua

ghalat-bayaniyon ke ahd-e-nau mein 'shad' aarfi

mera kamal-e-fan ye hai ki sirf majra hua