ba-qadr-e-did na the teri anjuman ke charagh

ba-qadr-e-dīd na the terī anjuman ke charāġh

mirī nigāh farozāñ huī hai ban ke charāġh

hazār bād-e-havādis hazār sarsar-e-ġham

jalā rahā huuñ magar azmat-e-chaman ke charāġh

nuqūsh-e-shahr-e-nigārāñ ubhārte hī rahe

mire junūñ ke ujāle tirī lagan ke charāġh

savād-e-asr meñ fardā kī tābnākī hai

bujhā diye ga.e andesha-e-kuhan ke charāġh

hujūm-e-ġham meñ huā thā ye kaun naġhma-sarā

jalī hai tīrgi-e-shām dard ban ke charāġh

na bād-e-dasht-o-bayābāñ na shām-e-ranj-o-balā

lahū se apne jalāte haiñ ham-vatan ke charāġh

jilau meñ tābish-e-qindīl-e-āgahī le kar

bujhā diye haiñ mohabbat ne ahrman ke charāġh

zamāna shām-e-balā se savāl kartā hai

kidhar ga.e vo tire daur-e-pur-fitan ke charāġh

sharār-e-nutq huā sarf-e-har-ḳhayāl 'urūj'

jale to bujh na sake shoḳhī-e-suḳhan ke charāġh

ba-qadr-e-did na the teri anjuman ke charagh

meri nigah farozan hui hai ban ke charagh

hazar baad-e-hawadis hazar sarsar-e-gham

jala raha hun magar azmat-e-chaman ke charagh

nuqush-e-shahr-e-nigaran ubhaarte hi rahe

mere junun ke ujale teri lagan ke charagh

sawad-e-asr mein farda ki tabnaki hai

bujha diye gae andesha-e-kuhan ke charagh

hujum-e-gham mein hua tha ye kaun naghma-sara

jali hai tirgi-e-sham dard ban ke charagh

na baad-e-dasht-o-bayaban na sham-e-ranj-o-bala

lahu se apne jalate hain ham-watan ke charagh

jilau mein tabish-e-qindil-e-agahi le kar

bujha diye hain mohabbat ne ahrman ke charagh

zamana sham-e-bala se sawal karta hai

kidhar gae wo tere daur-e-pur-fitan ke charagh

sharar-e-nutq hua sarf-e-har-KHayal 'uruj'

jale to bujh na sake shoKHi-e-suKHan ke charagh