ba-qadr-e-shauq maza iztirab ka na mila

ba-qadr-e-shauq mazā iztirāb kā na milā

ki dil ko dard milā bhī to lā-davā na milā

kahāñ pahuñch ke huā hai malāl-e-gumshudgī

ye sun rahā huuñ ki un ko mirā patā na milā

mazā milā thā mohabbat kī ibtidā meñ magar

phir us ke ba.ad aziyyat milī mazā na milā

bahut qarīb thī sarhadd-e-be-ḳhudī lekin

ḳhudī kī had meñ bhaTakte rahe ḳhudā na milā

jabīn-e-shauq meñ sajde the inqalāb-añgez

magar ye ḳhair huī un kā naqsh-e-pā na milā

hayāt-e-ishq ko dīdār-e-husn lāzim hai

tire baġhair kisī saañs meñ mazā na milā

talāsh-e-husn to hai himmat-āzmā 'shāhid'

mirī nigāh ko ab tak mirā patā na milā

ba-qadr-e-shauq maza iztirab ka na mila

ki dil ko dard mila bhi to la-dawa na mila

kahan pahunch ke hua hai malal-e-gumshudgi

ye sun raha hun ki un ko mera pata na mila

maza mila tha mohabbat ki ibtida mein magar

phir us ke baad aziyyat mili maza na mila

bahut qarib thi sarhadd-e-be-KHudi lekin

KHudi ki had mein bhaTakte rahe KHuda na mila

jabin-e-shauq mein sajde the inqalab-angez

magar ye KHair hui un ka naqsh-e-pa na mila

hayat-e-ishq ko didar-e-husn lazim hai

tere baghair kisi sans mein maza na mila

talash-e-husn to hai himmat-azma 'shahid'

meri nigah ko ab tak mera pata na mila