ba-sad aarzu jo wo aaya to ye hijab-e-ishq se haal tha

ba-sad aarzū jo vo aayā to ye hijāb-e-ishq se haal thā

ki hazāroñ dil meñ thiiñ hasrateñ aur uThānā aañkh muhāl thā

rahā shab jo ham se judā koī to kahe ye vāqi'a kyā koī

shab-e-hijr thī ki balā koī jise dekhte hī visāl thā

ruḳh-e-yār tā na paḌā nazar rahe ham alam se ye nauhagar

ki hamāre ranj-o-malāl par to malāl ko bhī malāl thā

kare kaun us se barābarī mah-o-zohra sab ko thī ham-sarī

dam-e-sub.h dekh sitamgarī ruḳh-e-mahr zarra-misāl thā

shab-e-vasl dekh ke ḳhvāb meñ maiñ paḌā thā saḳht 'azāb meñ

the hazār soch javāb meñ 'ajab us kā mujh se savāl thā

mire josh-e-ashk se bahra-var hue kul jahān ke bahr-o-bar

na barastī aaj ye chashm-e-tar to ḳhudā-na-ḳhvāsta kaal thā

jo numūd karte hī aap se lage baiThne vo shitāb se

to ye pūchhe koī hubāb se ki phulā.e apne ye gaal thā

havā maiñ bhī dāḳhil-e-kushtgāñ to 'abas tū hove hai sar-garāñ

ki mire gale kī taraf miyāñ tire āb-e-teġh kā Dhaal thā

diyā khā ke aap ne paan jo dil-e-mubtalā huā surḳh-rū

use samjhā peT kā bojh vo jo tumhāre muñh kā ugaal thā

jo marīz thā paḌā jāñ-ba-lab ḳhabar aur kuchh nahīñ us kī ab

magar itnā kahte haiñ log sab ki baḌā ye nek-ḳhisāl thā

jo chaman se duur qafas huā to maiñ aur asīr-e-havas huā

ye jo zulm ab ke baras huā yahī qahr agle bhī saal thā

nahīñ chāhtā hai ab āsmāñ ki ham aur vo huuñ ba-yak-makāñ

kahīñ aa gayā jo vo shab ko yaañ ki bulānā jis kā muhāl thā

to ye rañg chambar-e-charḳh kā nazar aa.e thā mujhe barmalā

kabhī thā siyah kabhī zard thā kabhī sabz thā kabhī laal thā

na kisī ne qadr kī 'jur.at' ab kahe she'r garche 'ajab 'ajab

jo na hoñge ham to kaheñge sab ki baḌā ye ahl-e-kamāl thā

ba-sad aarzu jo wo aaya to ye hijab-e-ishq se haal tha

ki hazaron dil mein thin hasraten aur uThana aankh muhaal tha

raha shab jo hum se juda koi to kahe ye waqi'a kya koi

shab-e-hijr thi ki bala koi jise dekhte hi visal tha

ruKH-e-yar ta na paDa nazar rahe hum alam se ye nauhagar

ki hamare ranj-o-malal par to malal ko bhi malal tha

kare kaun us se barabari mah-o-zohra sab ko thi ham-sari

dam-e-subh dekh sitamgari ruKH-e-mahr zarra-misal tha

shab-e-wasl dekh ke KHwab mein main paDa tha saKHt 'azab mein

the hazar soch jawab mein 'ajab us ka mujh se sawal tha

mere josh-e-ashk se bahra-war hue kul jahan ke bahr-o-bar

na barasti aaj ye chashm-e-tar to KHuda-na-KHwasta kal tha

jo numud karte hi aap se lage baiThne wo shitab se

to ye puchhe koi hubab se ki phulae apne ye gal tha

hawa main bhi daKHil-e-kushtgan to 'abas tu howe hai sar-garan

ki mere gale ki taraf miyan tere aab-e-tegh ka Dhaal tha

diya kha ke aap ne pan jo dil-e-mubtala hua surKH-ru

use samjha peT ka bojh wo jo tumhaare munh ka ugal tha

jo mariz tha paDa jaan-ba-lab KHabar aur kuchh nahin us ki ab

magar itna kahte hain log sab ki baDa ye nek-KHisal tha

jo chaman se dur qafas hua to main aur asir-e-hawas hua

ye jo zulm ab ke baras hua yahi qahr agle bhi sal tha

nahin chahta hai ab aasman ki hum aur wo hun ba-yak-makan

kahin aa gaya jo wo shab ko yan ki bulana jis ka muhaal tha

to ye rang chambar-e-charKH ka nazar aae tha mujhe barmala

kabhi tha siyah kabhi zard tha kabhi sabz tha kabhi lal tha

na kisi ne qadr ki 'jurat' ab kahe she'r garche 'ajab 'ajab

jo na honge hum to kahenge sab ki baDa ye ahl-e-kamal tha