ba-sad-KHulus ba-sad-ehtiram karte chalo

ba-sad-ḳhulūs ba-sad-ehtirām karte chalo

buzurg jab bhī mileñ tum salām karte chalo

adab se pyaar se aḳhlāq se mohabbat se

jo dushmanī kareñ un ko bhī raam karte chalo

dil-o-dimāġh meñ logoñ ke naqsh ho jaa.eñ

kuchh aise sher zamāne ke naam karte chalo

ḳhud apnī fikr to duniyā meñ sab hī karte haiñ

jo dūsroñ ke liye hoñ vo kaam karte chalo

dukhī diloñ ke liye ban ke ibn-e-mariyam tum

buland duniyā meñ apnā maqām karte chalo

zabāñ pe muhr lagī ho to rāh-e-ulfat meñ

nigāh-e-shauq se us ko payām karte chalo

ḳhudā kī bandagī ishq-e-rasūl se 'naġhmī'

tum apne aap par dozaḳh harām karte chalo

ba-sad-KHulus ba-sad-ehtiram karte chalo

buzurg jab bhi milen tum salam karte chalo

adab se pyar se aKHlaq se mohabbat se

jo dushmani karen un ko bhi ram karte chalo

dil-o-dimagh mein logon ke naqsh ho jaen

kuchh aise sher zamane ke nam karte chalo

KHud apni fikr to duniya mein sab hi karte hain

jo dusron ke liye hon wo kaam karte chalo

dukhi dilon ke liye ban ke ibn-e-mariyam tum

buland duniya mein apna maqam karte chalo

zaban pe muhr lagi ho to rah-e-ulfat mein

nigah-e-shauq se us ko payam karte chalo

KHuda ki bandagi ishq-e-rasul se 'naghmi'

tum apne aap par dozaKH haram karte chalo