ba-sad shikoh ba-sad aan-ban niklegi

ba-sad shikoh ba-sad ān-bān niklegī

hamāre saath zamāne kī jaan niklegī

ye zindagī ke qarīne se āshkārā hai

ki apnī maut bhī azmat-nishān niklegī

mujhe yaqīn hai apnī vafā pe kuchh itnā

tirī jafā bhī mirī ham-zabān niklegī

zabān khul ga.ī merī kahīñ jo mahshar meñ

har ek harf se ik dāstān niklegī

jo zindagī kī balā thī vo Tal ga.ī sar se

kise ḳhabar thī ajal mehrbān niklegī

jahāñ kareñge kabhī qasd sar uThāne kā

zamīñ bhī apne liye āsmān niklegī

zarūr hogā sabab koī bad-gumānī kā

zarūriyāt koī darmiyān niklegī

jahāñ zabāñ ko milegā na izn-e-goyā.ī

vahāñ hamārī nazar tarjumān niklegī

gudāz-e-ishq hai kis meñ havas parast hai kaun

nigāh-e-dost pa.e-imtihān niklegī

kisī kī sūrat--e-ma.asūm de ga.ī dhokā

ḳhayāl thā ki bahut be-zabān niklegī

vo dil jo tañg ba-zāhir hai is qadar hamdam

usī meñ vus.at-e-kaun-o-makān niklegī

sadā-bahār gulsitāñ hai shā.irī apnī

ḳhudā rakhe ye hamesha javān niklegī

ye mutma.in na kabhī ho sakegī ai 'tālib'

nigāh-e-dost bahut bad-gumān niklegī

ba-sad shikoh ba-sad aan-ban niklegi

hamare sath zamane ki jaan niklegi

ye zindagi ke qarine se aashkara hai

ki apni maut bhi azmat-nishan niklegi

mujhe yaqin hai apni wafa pe kuchh itna

teri jafa bhi meri ham-zaban niklegi

zaban khul gai meri kahin jo mahshar mein

har ek harf se ek dastan niklegi

jo zindagi ki bala thi wo Tal gai sar se

kise KHabar thi ajal mehrban niklegi

jahan karenge kabhi qasd sar uThane ka

zamin bhi apne liye aasman niklegi

zarur hoga sabab koi bad-gumani ka

zaruriyat koi darmiyan niklegi

jahan zaban ko milega na izn-e-goyai

wahan hamari nazar tarjuman niklegi

gudaz-e-ishq hai kis mein hawas parast hai kaun

nigah-e-dost pae-imtihan niklegi

kisi ki surat--e-masum de gai dhoka

KHayal tha ki bahut be-zaban niklegi

wo dil jo tang ba-zahir hai is qadar hamdam

usi mein wusat-e-kaun-o-makan niklegi

sada-bahaar gulsitan hai shairi apni

KHuda rakhe ye hamesha jawan niklegi

ye mutmain na kabhi ho sakegi ai 'talib'

nigah-e-dost bahut bad-guman niklegi