بہ شکل شبنم ٹپک کے ہر گل پہ حسن گل کا نکھار ہو جا

بہ شکل شبنم ٹپک کے ہر گل پہ حسن گل کا نکھار ہو جا

گل محبت کی جستجو میں کلی کلی پر نثار ہو جا

صبا کی صورت چمن پہ چھا جا نوید صبح بہار ہو جا

چمن میں ہر شاخ گل کی زینت ہر اک کلی کا سنگار ہو جا

گلوں کے نرم و لطیف ہونٹوں پہ مسکراہٹ کے رنگ بھر دے

بہا کے خون جگر کو اپنے چمن میں تو لالہ زار ہو جا

نہ بن سکا گر نوید عشرت تو کچھ تو حاصل ہو زندگی کا

فسردہ ہونٹوں کی تھرتھراہٹ دکھی دلوں کی پکار ہو جا

ضیاؔ جوانی ہے چار دن کی بتا دے اوس کو بھی مے کشی میں

یہ زہد و تقویٰ کا ڈھونگ کیسا لے جام لے بادہ خوار ہو جا