ba-shakl-e-shabnam Tapak ke har gul pe husn-e-gul ka nikhaar ho ja

ba-shakl-e-shabnam Tapak ke har gul pe husn-e-gul kā nikhār ho jā

gul-e-mohabbat kī justujū meñ kalī kalī par nisār ho jā

sabā kī sūrat chaman pe chhā jā naved-e-sub.h-e-bahār ho jā

chaman meñ har shāḳh-e-gul kī zīnat har ik kalī kā siñgār ho jā

guloñ ke narm o latīf hoñToñ pa muskurāhaT ke rang bhar de

bahā ke ḳhūn-e-jigar ko apne chaman meñ tū lāla-zār ho jā

na ban sakā gar naved-e-ishrat to kuchh to hāsil ho zindagī kā

fasurda hoñToñ kī thartharāhaT dukhī diloñ kī pukār ho jā

'ziyā' javānī hai chaar din kī bitā de us ko bhī mai-kashī meñ

ye zohd-o-taqvā kā Dhoñg kaisā le jaam le bāda-ḳhvār ho jā

ba-shakl-e-shabnam Tapak ke har gul pe husn-e-gul ka nikhaar ho ja

gul-e-mohabbat ki justuju mein kali kali par nisar ho ja

saba ki surat chaman pe chha ja nawed-e-subh-e-bahaar ho ja

chaman mein har shaKH-e-gul ki zinat har ek kali ka singar ho ja

gulon ke narm o latif honTon pa muskurahaT ke rang bhar de

baha ke KHun-e-jigar ko apne chaman mein tu lala-zar ho ja

na ban saka gar nawed-e-ishrat to kuchh to hasil ho zindagi ka

fasurda honTon ki thartharahaT dukhi dilon ki pukar ho ja

'ziya' jawani hai chaar din ki bita de us ko bhi mai-kashi mein

ye zohd-o-taqwa ka Dhong kaisa le jam le baada-KHwar ho ja