ba-tarf-e-mushtaq gah-gahe tujhe munasib guzar kiya kar

ba-tarf-e-mushtāq gāh-gāhe tujhe munāsib guzar kiyā kar

jale hai dil kī bhī āh-e-sozāñ se kaj-kulāhā hazar kiyā kar

jo ghar se bāhar na deve ruḳhsat hayā agarche ba-sair-e-gulshan

kabhī to rauzan se bar-lab-e-bām apne aa kar nazar kiyā kar

ba-talkh dushnām be-muravvat muzā.eqa to nahīñ hai is meñ

do lab se apne hamārī qismat kī aisī rozī shakar kiyā kar

na qadr hūr-o-parī kī hargiz samā.e āñkhoñ meñ tere aage

tujhe hai lāzim kabhī to pursish ze-hāl-e-ḳhūnīñ-jigar kiyā kar

galī meñ terī nahīñ ijāzat hai shab kī aane kī mujh ko lekin

raqīb-o-ġhammaz apne kūche se be-muravvat badar kiyā kar

na chain din ko na ḳhvāb shab ko sabab se hijrat ke terī mujh ko

ba-nāz-o-tamkīn-o-sadqa-e-husn ek bosa nazar kiyā kar

ba-āh-o-zārī fuġhān naala se apne yaaro maiñ roz kahtā

kabhī sitamgar ke jā ke dil meñ are ni-bhāge asar kiyā kar

kahā thā nāseh ne ishq-bāzī bahut kaThin hai na honā āshiq

ki qurb majlis se un butoñ kī gar aql rakhtā ḳhatar kiyā kar

gar 'āfrīdī' ke ārzū-dil hai vasl is kā to vājib aayā

mile na jab tak galī meñ us ke to ḳhaak miTTī basar kiyā kar

ba-tarf-e-mushtaq gah-gahe tujhe munasib guzar kiya kar

jale hai dil ki bhi aah-e-sozan se kaj-kulaha hazar kiya kar

jo ghar se bahar na dewe ruKHsat haya agarche ba-sair-e-gulshan

kabhi to rauzan se bar-lab-e-baam apne aa kar nazar kiya kar

ba-talkh dushnam be-murawwat muzaeqa to nahin hai is mein

do lab se apne hamari qismat ki aisi rozi shakar kiya kar

na qadr hur-o-pari ki hargiz samae aankhon mein tere aage

tujhe hai lazim kabhi to pursish ze-haal-e-KHunin-jigar kiya kar

gali mein teri nahin ijazat hai shab ki aane ki mujh ko lekin

raqib-o-ghammaz apne kuche se be-murawwat badar kiya kar

na chain din ko na KHwab shab ko sabab se hijrat ke teri mujh ko

ba-naz-o-tamkin-o-sadqa-e-husn ek bosa nazar kiya kar

ba-ah-o-zari fughan nala se apne yaro main roz kahta

kabhi sitamgar ke ja ke dil mein are ni-bhage asar kiya kar

kaha tha naseh ne ishq-bazi bahut kaThin hai na hona aashiq

ki qurb majlis se un buton ki gar aql rakhta KHatar kiya kar

gar 'afridi' ke aarzu-dil hai wasl is ka to wajib aaya

mile na jab tak gali mein us ke to KHak miTTi basar kiya kar