بہ طرف‌ مشتاق گاہ گاہے تجھے مناسب گزر کیا کر

بہ طرف‌ مشتاق گاہ گاہے تجھے مناسب گزر کیا کر

جلے ہے دل کی بھی آہ سوزاں سے کجکلاہا حذر کیا کر

جو گھر سے باہر نہ دیوے رخصت حیا اگرچہ بہ سیر گلشن

کبھی تو روزن سے بر لب بام اپنے آ کر نظر کیا کر

بتلخ‌ دشنام بے مروت مضایقہ تو نہیں ہے اس میں

دو لب سے اپنے ہماری قسمت کی ایسی روزی شکر کیا کر

نہ قدر حور و پری کی ہرگز سمائے آنکھوں میں تیرے آگے

تجھے ہے لازم کبھی تو پرسش ز حال خونیں‌ جگر کیا کر

گلی میں تیری نہیں اجازت ہے شب کی آنے کی مجھ کو لیکن

رقیب‌ و غماز اپنے کوچے سے بے مروت بدر کیا کر

نہ چین دن کو نہ خواب شب کو سبب سے ہجرت کے تیری مجھ کو

بہ ناز و تمکین و صدقہ حسن ایک بوسہ نذر کیا کر

بہ آہ و زاری فغان نالہ سے اپنے یارو میں روز کہتا

کبھی ستم گر کے جا کے دل میں ارے نبھاگے اثر کیا کر

کہا تھا ناصح نے عشق بازی بہت کٹھن ہے نہ ہونا عاشق

کہ قرب مجلس سے ان بتوں کی گر عقل رکھتا خطر کیا کر

گر آفریدیؔ کے آرزو دل ہے وصل اس کا تو واجب آیا

ملے نہ جب تک گلی میں اس کے تو خاک مٹی بسر کیا کر