ba-tarz-e-dilbari be-dad kije

ba-tarz-e-dilbarī be-dād kiije

jafāoñ meñ adā ījād kiije

hamārī ājizī e.ajāz ho jaa.e

payambar huuñ agar āzād kiije

ye kaisā ālam-e-bālā kā jhagḌā

ajī pahlū mirā ābād kiije

lahū mal kar shahīdoñ meñ mile haiñ

hamāre naam par bhī saad kiije

tamannā baḌh na jaa.e had se zaa.ed

hameñ shāh-e-najaf ab yaad kiije

hamārī ḳhaak se sahrā bhare haiñ

jahāñ tak chāhiye barbād kiije

ishāroñ ne to le lī jaan sāhib

zarā muñh se bhī kuchh irshād kiije

pareshān hai bahut 'anjum' ḳhudārā

shahīd-e-karbalā imdād kiije

mizāj-e-yār ho jaa.e na barham

na ai 'anjum' bahut fariyād kiije

ba-tarz-e-dilbari be-dad kije

jafaon mein ada ijad kije

hamari aajizi eajaz ho jae

payambar hun agar aazad kije

ye kaisa aalam-e-baala ka jhagDa

aji pahlu mera aabaad kije

lahu mal kar shahidon mein mile hain

hamare nam par bhi sad kije

tamanna baDh na jae had se zaed

hamein shah-e-najaf ab yaad kije

hamari KHak se sahra bhare hain

jahan tak chahiye barbaad kije

ishaaron ne to le li jaan sahib

zara munh se bhi kuchh irshad kije

pareshan hai bahut 'anjum' KHudara

shahid-e-karbala imdad kije

mizaj-e-yar ho jae na barham

na ai 'anjum' bahut fariyaad kije