ba-waqt-e-fajr andhere se raushni ki taraf

ba-vaqt-e-fajr añdhere se raushnī kī taraf

maiñ rāh-e-marg se aayā huuñ zindagī kī taraf

vufūr-e-husn mazāhir se bad-ravī kī taraf

sukūt-e-vaqt se aayā huuñ maiñ ghaḌī kī taraf

ḳhudā-e-arz-o-samā an-kahī kā falsafa thā

ye kun to āḳhirī harba hai āgahī kī taraf

huqūq-e-insāñ pe lecture kā in’iqād huā

alag kiye ga.e kuchh bachche gallery kī taraf

zamīñ pe ḳhatm huā silsila ‘atāoñ kā

safar shurū' hai avval se āḳhirī kī taraf

taġhayyurāt-e-'adam se uThī bahār-e-vujūd

nasheb-e-dasht se rasta banā namī kī taraf

salīqa-mand mashīnoñ meñ bā-shu'ūr īñdhan

nazar uThā ke to dekho na.ī sadī kī taraf

ufuq pe chāñd thā masjid meñ vaqt-e-farz-namāz

shu'ā'-e-kufr se aayā maiñ bandagī kī taraf

na.e chalan se kiran kā zuhūr bhī nayā hai

nigār-e-hast bhī yā'nī hai behtarī kī taraf

rumūz-e-vaqt kī pahlī class meñ bhī mirā

tamām dhyān thā sarkārī naukrī kī taraf

ba-waqt-e-fajr andhere se raushni ki taraf

main rah-e-marg se aaya hun zindagi ki taraf

wufur-e-husn mazahir se bad-rawi ki taraf

sukut-e-waqt se aaya hun main ghaDi ki taraf

KHuda-e-arz-o-sama an-kahi ka falsafa tha

ye kun to aaKHiri harba hai aagahi ki taraf

huquq-e-insan pe lecture ka in’iqad hua

alag kiye gae kuchh bachche gallery ki taraf

zamin pe KHatm hua silsila ‘ataon ka

safar shuru' hai awwal se aaKHiri ki taraf

taghayyuraat-e-'adam se uThi bahaar-e-wujud

nasheb-e-dasht se rasta bana nami ki taraf

saliqa-mand mashinon mein ba-shu'ur indhan

nazar uTha ke to dekho nai sadi ki taraf

ufuq pe chand tha masjid mein waqt-e-farz-namaz

shu'a'-e-kufr se aaya main bandagi ki taraf

nae chalan se kiran ka zuhur bhi naya hai

nigar-e-hast bhi ya'ni hai behtari ki taraf

rumuz-e-waqt ki pahli class mein bhi mera

tamam dhyan tha sarkari naukri ki taraf