ba-waqt-e-marg gham-e-zindagi to kya hoga

ba-vaqt-e-marg ġham-e-zindagī to kyā hogā

nikal ga.ī jo hamārī hañsī to kyā hogā

huī jo un se mulāqāt bhī to kyā hogā

agar na ham se huī baat hī to kyā hogā

añdhere jā ke kahāñ apnā muñh chhupā.eñge

hamāre ghar meñ huī raushnī to kyā hogā

hamāre vāste dil kī lagī bajā lekin

vo kar rahe hoñ agar dil-lagī to kyā hogā

ye maanā ham ne ki shabnam tū ro.egī shab-bhar

sahar ko gul ko na aa.ī hañsī to kyā hogā

karūñgā dil ko jalā kar maiñ raushnī kab tak

na shām-e-ġham kī sahar hī huī to kyā hogā

kisī kī tirchhī nazar baat to hai mā'mūlī

ye phāñs dil meñ hī aTkī rahī to kyā hogā

khileñgī fasl-e-bahārāñ meñ har taraf kaliyāñ

magar ga.ī na mirī bekalī to kyā hogā

jab un ko dekhte hī dil dhaḌakne lagtā hai

jo un se milnā hī Thahrā kabhī to kyā hogā

abhī se husn hamārī anā se nālāñ hai

jatā.ī 'ishq kī jab bartarī to kyā hogā

'amar' abhī se falak par dimāġh hai apnā

milī jo ham ko kahīñ bartarī to kyā hogā

ba-waqt-e-marg gham-e-zindagi to kya hoga

nikal gai jo hamari hansi to kya hoga

hui jo un se mulaqat bhi to kya hoga

agar na hum se hui baat hi to kya hoga

andhere ja ke kahan apna munh chhupaenge

hamare ghar mein hui raushni to kya hoga

hamare waste dil ki lagi baja lekin

wo kar rahe hon agar dil-lagi to kya hoga

ye mana hum ne ki shabnam tu roegi shab-bhar

sahar ko gul ko na aai hansi to kya hoga

karunga dil ko jala kar main raushni kab tak

na sham-e-gham ki sahar hi hui to kya hoga

kisi ki tirchhi nazar baat to hai ma'muli

ye phans dil mein hi aTki rahi to kya hoga

khilengi fasl-e-bahaaran mein har taraf kaliyan

magar gai na meri bekali to kya hoga

jab un ko dekhte hi dil dhaDakne lagta hai

jo un se milna hi Thahra kabhi to kya hoga

abhi se husn hamari ana se nalan hai

jatai 'ishq ki jab bartari to kya hoga

'amar' abhi se falak par dimagh hai apna

mili jo hum ko kahin bartari to kya hoga