با ادب قیمتی سامان میں رکھا جائے

با ادب قیمتی سامان میں رکھا جائے

اس کا خط ریشمی جزدان میں رکھا جائے

اس کا اک جرم ہے اور وہ بھی فقط ترک وفا

اس کا حق ہے کہ اسے دھیان میں رکھا جائے

بس یہی سوچ کے تھاما تھا کسی کا دامن

پھول اچھا ہو تو گلدان میں رکھا جائے

میں محبت کو عبادت کی جگہ رکھتا ہوں

مجھ سے مجرم کو تو زندان میں رکھا جائے

اس کی یادوں سے کشیدوں گا نیا رزق سخن

مجھ کو سرگرداں بیابان میں رکھا جائے

میں تو اس دل سے پریشاں ہوں مرے خانہ بدوشؔ

دوسرا دل تن بے جان میں رکھا جائے