ba-wafa tariKH ke auraq mein mane gae

bā-vafā tārīḳh ke aurāq meñ maane ga.e

jin alam-dāroñ ke dariyāoñ pe kaT shāne ga.e

ham to apne the magar rāñda ga.e the ishq meñ

un se milne ke liye is baar begāne ga.e

nāsehān-e-shahr ab us ke taraf-dāroñ meñ haiñ

jo yahāñ se us parī-paikar ko samjhāne ga.e

shaiḳh sāhib jānib-e-ka.aba ga.e the zo'm se

ham subū-kash sub.h-e-sādiq uTh ke mai-ḳhāne ga.e

ahl-e-dil phir bhī na baaz aa.e mohabbat se kabhī

anginat is āshiqī meñ jaañ se dīvāne ga.e

kūcha-e-jānāñ meñ sab ke lab pe merā naam thā

us galī meñ mujh se pahle mere afsāne ga.e

har koī gum ho gayā nākāmiyoñ ke dasht meñ

ham magar 'tanhā' jahāñ meñ fan se pahchāne ga.e

ba-wafa tariKH ke auraq mein mane gae

jin alam-daron ke dariyaon pe kaT shane gae

hum to apne the magar randa gae the ishq mein

un se milne ke liye is bar begane gae

nasehan-e-shahr ab us ke taraf-daron mein hain

jo yahan se us pari-paikar ko samjhane gae

shaiKH sahib jaanib-e-kaba gae the zo'm se

hum subu-kash subh-e-sadiq uTh ke mai-KHane gae

ahl-e-dil phir bhi na baz aae mohabbat se kabhi

anginat is aashiqi mein jaan se diwane gae

kucha-e-jaanan mein sab ke lab pe mera nam tha

us gali mein mujh se pahle mere afsane gae

har koi gum ho gaya nakaamiyon ke dasht mein

hum magar 'tanha' jahan mein fan se pahchane gae