با وفا تاریخ کے اوراق میں مانے گئے

با وفا تاریخ کے اوراق میں مانے گئے

جن علم داروں کے دریاؤں پہ کٹ شانے گئے

ہم تو اپنے تھے مگر راندہ گئے تھے عشق میں

ان سے ملنے کے لیے اس بار بیگانے گئے

ناصحان شہر اب اس کے طرف داروں میں ہیں

جو یہاں سے اس پری پیکر کو سمجھانے گئے

شیخ صاحب جانب کعبہ گئے تھے زعم سے

ہم سبو کش صبح صادق اٹھ کے مے خانے گئے

اہل دل پھر بھی نہ باز آئے محبت سے کبھی

انگنت اس عاشقی میں جاں سے دیوانے گئے

کوچۂ جاناں میں سب کے لب پہ میرا نام تھا

اس گلی میں مجھ سے پہلے میرے افسانے گئے

ہر کوئی گم ہو گیا ناکامیوں کے دشت میں

ہم مگر تنہاؔ جہاں میں فن سے پہچانے گئے