ba-waqar lahje mein pur-asar kaha jae

bā-vaqār lahje meñ pur-asar kahā jaa.e

dil kā haal kuchh bhī ho muḳhtasar kahā jaa.e

vus.at-e-taḳhayyul ko bāl-o-par kahā jaa.e

shauq kī bulandī ko bām-o-dar kahā jaa.e

kyoñ na ham badal Dāleñ kohna istelāhoñ ko

kyoñ na aaj qātil ko chārāgar kahā jaa.e

zindagī kī rāhoñ meñ kaun saath detā hai

kis ko is masāfat meñ ham-safar kahā jaa.e

jis taraf se vo guzreñ bas vo rahguzar Thahre

aam rāste ko kyoñ rahguzar kahā jaa.e

chāhe jis tarah kahiye ḳhatm ho nahīñ saktā

ishq vo fasāna hai umr bhar kahā jaa.e

vo chaman ho yā sahrā donoñ ek jaise haiñ

ik ajiib uljhan hai kis ko ghar kahā jaa.e

dil kī raushnī ko log kyoñ sahar nahīñ kahte

vaqt ke ujāle ko kyoñ sahar kahā jaa.e

gumrahī kī manzil meñ kis ko aaj ai 'jauhar'

rāhzan kahā jaa.e rāhbar kahā jaa.e

ba-waqar lahje mein pur-asar kaha jae

dil ka haal kuchh bhi ho muKHtasar kaha jae

wusat-e-taKHayyul ko baal-o-par kaha jae

shauq ki bulandi ko baam-o-dar kaha jae

kyon na hum badal Dalen kohna istelahon ko

kyon na aaj qatil ko chaaragar kaha jae

zindagi ki rahon mein kaun sath deta hai

kis ko is masafat mein ham-safar kaha jae

jis taraf se wo guzren bas wo rahguzar Thahre

aam raste ko kyon rahguzar kaha jae

chahe jis tarah kahiye KHatm ho nahin sakta

ishq wo fasana hai umr bhar kaha jae

wo chaman ho ya sahra donon ek jaise hain

ek ajib uljhan hai kis ko ghar kaha jae

dil ki raushni ko log kyon sahar nahin kahte

waqt ke ujale ko kyon sahar kaha jae

gumrahi ki manzil mein kis ko aaj ai 'jauhar'

rahzan kaha jae rahbar kaha jae