bab-e-hairat se mujhe izn-e-safar hone ko hai

bāb-e-hairat se mujhe izn-e-safar hone ko hai

tahniyat ai dil ki ab dīvār dar hone ko hai

khol deñ zanjīr-e-dar aur hauz ko ḳhālī kareñ

zindagī ke baaġh meñ ab sah-pahar hone ko hai

maut kī aahaT sunā.ī de rahī hai dil meñ kyuuñ

kyā mohabbat se bahut ḳhālī ye ghar hone ko hai

gard-e-rah ban kar koī hāsil safar kā ho gayā

ḳhaak meñ mil kar koī la.al-o-guhar hone ko hai

ik chamak sī to nazar aa.ī hai apnī ḳhaak meñ

mujh pe bhī shāyad tavajjoh kī nazar hone ko hai

gum-shuda bastī musāfir lauT kar aate nahīñ

mo.ajaza aisā magar bār-e-digar hone ko hai

raunaq-e-bāzār-o-mahfil kam nahīñ hai aaj bhī

sāneha is shahr meñ koī magar hone ko hai

ghar kā saarā rāsta is sarḳhushī meñ kaT gayā

is se agle moḌ koī ham-safar hone ko hai

bab-e-hairat se mujhe izn-e-safar hone ko hai

tahniyat ai dil ki ab diwar dar hone ko hai

khol den zanjir-e-dar aur hauz ko KHali karen

zindagi ke bagh mein ab sah-pahar hone ko hai

maut ki aahaT sunai de rahi hai dil mein kyun

kya mohabbat se bahut KHali ye ghar hone ko hai

gard-e-rah ban kar koi hasil safar ka ho gaya

KHak mein mil kar koi lal-o-guhar hone ko hai

ek chamak si to nazar aai hai apni KHak mein

mujh pe bhi shayad tawajjoh ki nazar hone ko hai

gum-shuda basti musafir lauT kar aate nahin

moajaza aisa magar bar-e-digar hone ko hai

raunaq-e-bazar-o-mahfil kam nahin hai aaj bhi

saneha is shahr mein koi magar hone ko hai

ghar ka sara rasta is sarKHushi mein kaT gaya

is se agle moD koi ham-safar hone ko hai