باد مخالف پوچھ رہی ہے وقت کے کھیون ہاروں سے

باد مخالف پوچھ رہی ہے وقت کے کھیون ہاروں سے

کیسے نیا پار لگے گی گھن کھائی پتواروں سے

بٹوارے کی دیمک آخر ان کو چاٹ گئی ہوگی

بوسیدہ کمرے کا بھرم تھا قائم جن دیواروں سے

جانے تمہاری فہم و فراست کن قبروں میں دفن ہوئی

کاغذ کی پوشاک بدن پر یارانے انگاروں سے

مانگے کے پر کب چھن جائیں اڑتے ہوئے کب گر جاؤ

ہم جیسے بے پر اچھے ہیں تم جیسے پر داروں سے

کل تک جن کو ناز تھا یارو اپنی چارہ سازی پر

درد کا درماں پوچھ رہے ہیں آج وہی بیماروں سے

لفظ مجاہد لکھ تو لیا ہے اپنے اپنے سینوں پر

معرکہ کیسے سر کر لو گے زنگ لگے ہتھیاروں سے

شہزرؔ اس سے جا کر کہہ دو وقت ترا پابند نہیں

آج کی خبریں مانگ رہا ہے جو کل کے اخباروں سے