baad-e-muKhaalif puchh rahi hai waqt ke khewan-haaron se

bād-e-muḳhālif pūchh rahī hai vaqt ke khevan-hāroñ se

kaise nayyā paar lagegī ghun-khā.ī patvāroñ se

baTvāre kī dīmak āḳhir un ko chaaT ga.ī hogī

bosīda kamre kā bharam thā qaa.em jin dīvāroñ se

jaane tumhārī fahm-o-farāsat kin qabroñ meñ dafn huī

kāġhaz kī poshāk badan par yārāne angāroñ se

māñge ke par kab chhin jaa.eñ uḌte hue kab gir jaao

ham jaise be-par achchhe haiñ tum jaise par-dāroñ se

kal tak jin ko naaz thā yaaro apnī chārasāzī par

dard kā darmāñ pūchh rahe haiñ aaj vahī bīmāroñ se

lafz-e-mujāhid likh to liyā hai apne apne sīnoñ par

ma.arka kaise sar kar loge zañg lage hathiyāroñ se

'shahzar' us se jā kar kah do vaqt tirā pāband nahīñ

aaj kī ḳhabareñ maañg rahā hai jo kal ke aḳhbāroñ se

baad-e-muKHalif puchh rahi hai waqt ke khewan-haaron se

kaise nayya par lagegi ghun-khai patwaron se

baTware ki dimak aaKHir un ko chaT gai hogi

bosida kamre ka bharam tha qaem jin diwaron se

jaane tumhaari fahm-o-farasat kin qabron mein dafn hui

kaghaz ki poshak badan par yarane angaron se

mange ke par kab chhin jaen uDte hue kab gir jao

hum jaise be-par achchhe hain tum jaise par-daron se

kal tak jin ko naz tha yaro apni chaarasazi par

dard ka darman puchh rahe hain aaj wahi bimaron se

lafz-e-mujahid likh to liya hai apne apne sinon par

marka kaise sar kar loge zang lage hathiyaron se

'shahzar' us se ja kar kah do waqt tera paband nahin

aaj ki KHabaren mang raha hai jo kal ke aKHbaron se