baad-e-sarsar bhi qurbat ki chalti rahe din nikalta rahe sham Dhalti rahe

bād-e-sarsar bhī qurbat kī chaltī rahe din nikaltā rahe shaam Dhaltī rahe

zulf hāthoñ se tere sañvartī rahe din nikaltā rahe shaam Dhaltī rahe

terī chāhat gulāboñ kī ḳhushbū bane mere dīvār-o-dar meñ kuchh aisī base

terī mahkār kamre se aatī rahe din nikaltā rahe shaam Dhaltī rahe

tere ehsās kī tan pe chādar liye tere hamrāh raqsāñ meñ aise rahūñ

pyaar kī mujh pe badlī barastī rahe din nikaltā rahe shaam Dhaltī rahe

ruuh se ruuh kā rabt aisā bane jaise hāthoñ meñ tere mirā haath ho

phir mulāqāt ḳhvāboñ meñ hotī rahe din nikaltā rahe shaam Dhaltī rahe

merī ġhazloñ meñ terā hī mazmūn ho merī nazmoñ meñ to mujh se bāteñ kare

yuuñ bayāz-e-tamannā bhī bhartī rahe din nikaltā rahe shaam Dhaltī rahe

pyaar ke saat rañgoñ kī qaus-e-quzah le ke aa.e 'sabīla' vo milne kabhī

zindagī phir vahīñ ruk ke hañstī rahe din nikaltā rahe shaam Dhaltī rahe

baad-e-sarsar bhi qurbat ki chalti rahe din nikalta rahe sham Dhalti rahe

zulf hathon se tere sanwarti rahe din nikalta rahe sham Dhalti rahe

teri chahat gulabon ki KHushbu bane mere diwar-o-dar mein kuchh aisi base

teri mahkar kamre se aati rahe din nikalta rahe sham Dhalti rahe

tere ehsas ki tan pe chadar liye tere hamrah raqsan mein aise rahun

pyar ki mujh pe badli barasti rahe din nikalta rahe sham Dhalti rahe

ruh se ruh ka rabt aisa bane jaise hathon mein tere mera hath ho

phir mulaqat KHwabon mein hoti rahe din nikalta rahe sham Dhalti rahe

meri ghazlon mein tera hi mazmun ho meri nazmon mein to mujh se baaten kare

yun bayaz-e-tamanna bhi bharti rahe din nikalta rahe sham Dhalti rahe

pyar ke sat rangon ki qaus-e-quzah le ke aae 'sabila' wo milne kabhi

zindagi phir wahin ruk ke hansti rahe din nikalta rahe sham Dhalti rahe