بعد مدت کے ہوا ایسی چلی ہے یارو

بعد مدت کے ہوا ایسی چلی ہے یارو

ان کی ہر بات مرے جی کو لگی ہے یارو

امتزاج آہ و فغاں نالہ و فریاد کا ہے

زندگی درد کے سانچے میں ڈھلی ہے یارو

جذبۂ جوش جنوں کا یہی انجام تو ہے

عمر بھر مشغلہ جامہ دری ہے یارو

یہاں ہر سمت مرے خون کی گلکاری ہے

یہ نہ بھولو مرے قاتل کی گلی ہے یارو

بر طرف کر دیا تھا اس نے جہاں سے ہم کو

خاک اس کوچے کی بھی ہم نے ملی ہے یارو

قطرۂ اشک کے اسباب و خلل بھی نہ چھپے

جب سے رونے کی یہ عادت سی پڑی ہے یارو

یہ تمنا کہ ملیں صبح قیامت میں ہم

بڑی مشکل سے اک اک رات کٹی ہے یارو

فاتحہ اب تو پڑھو اشک بہا لو تم بھی

اب ہمیں اپنی قضا لے کے چلی ہے یارو

دل کی دھڑکن بھی شفقؔ تیز ہوئی جاتی ہے

ان کے قدموں کی جو آہٹ سی سنی ہے یارو