baad muddat ke hawa aisi chali hai yaro

baad muddat ke havā aisī chalī hai yaaro

un kī har baat mire jī ko lagī hai yaaro

imtizāj āh-o-fuġhāñ nāla-o-fariyād kā hai

zindagī dard ke sāñche meñ Dhalī hai yaaro

jazba-e-josh-e-junūñ kā yahī anjām to hai

umr bhar mashġhala-e-jāma-darī hai yaaro

yahāñ har samt mire ḳhuun kī gul-kārī hai

ye na bhūlo mire qātil kī galī hai yaaro

bartaraf kar diyā thā us ne jahāñ se ham ko

ḳhaak us kūche kī bhī ham ne malī hai yaaro

qatra-e-ashk ke asbāb-o-ḳhalal bhī na chhupe

jab se rone kī ye aadat sī paḌī hai yaaro

ye tamanna ki mileñ sub.h-e-qayāmat meñ ham

baḌī mushkil se ik ik raat kaTī hai yaaro

fātiha ab to paḌho ashk bahā lo tum bhī

ab hameñ apnī qazā le ke chalī hai yaaro

dil kī dhaḌkan bhī 'shafaq' tez huī jaatī hai

un ke qadmoñ kī jo aahaT sī sunī hai yaaro

baad muddat ke hawa aisi chali hai yaro

un ki har baat mere ji ko lagi hai yaro

imtizaj aah-o-fughan nala-o-fariyaad ka hai

zindagi dard ke sanche mein Dhali hai yaro

jazba-e-josh-e-junun ka yahi anjam to hai

umr bhar mashghala-e-jama-dari hai yaro

yahan har samt mere KHun ki gul-kari hai

ye na bhulo mere qatil ki gali hai yaro

bartaraf kar diya tha us ne jahan se hum ko

KHak us kuche ki bhi hum ne mali hai yaro

qatra-e-ashk ke asbab-o-KHalal bhi na chhupe

jab se rone ki ye aadat si paDi hai yaro

ye tamanna ki milen subh-e-qayamat mein hum

baDi mushkil se ek ek raat kaTi hai yaro

fatiha ab to paDho ashk baha lo tum bhi

ab hamein apni qaza le ke chali hai yaro

dil ki dhaDkan bhi 'shafaq' tez hui jati hai

un ke qadmon ki jo aahaT si suni hai yaro