baad muddat ke samundar ka hua hun main bhi

baad muddat ke samundar kā huā huuñ maiñ bhī

ik qadam aur ki bas aa hī gayā huuñ maiñ bhī

dasht-e-pur-ḳhār meñ ye sho.ala-e-raftār kī zau

ai sabā dekh ki ik ābla-pā huuñ maiñ bhī

apne is sar se utartā nahīñ girtā bhī nahīñ

kyā ajab shor huuñ aur kaisī balā huuñ maiñ bhī

merī āñkhoñ meñ na utrā vahī paikar huuñ maiñ

mere hoñToñ pe na aa.ī vo duā huuñ maiñ bhī

mujh ko mat DhūñDh mire chāhne vāloñ meñ kahīñ

chāhne vāloñ ke atrāf khaḌā huuñ maiñ bhī

sāmne paḌte nazar aate haiñ apne hī qadam

kyā sunūñ ḳhud ko ki apnī hī sadā huuñ maiñ bhī

mujh pe barsānā dahakte hue sūraj kī tapish

āsmāñ dekh ki ik terī ghaTā huuñ maiñ bhī

ab kahāñ jā.egī ujḌe hue mausam kī bahār

is ḳharābe meñ kahīñ duur khaḌā huuñ maiñ bhī

sāneha koī shafaq paar chamakne ko hai

qāfila-shab ke guzarne kī sadā huuñ maiñ bhī

baad muddat ke samundar ka hua hun main bhi

ek qadam aur ki bas aa hi gaya hun main bhi

dasht-e-pur-KHar mein ye shoala-e-raftar ki zau

ai saba dekh ki ek aabla-pa hun main bhi

apne is sar se utarta nahin girta bhi nahin

kya ajab shor hun aur kaisi bala hun main bhi

meri aankhon mein na utra wahi paikar hun main

mere honTon pe na aai wo dua hun main bhi

mujh ko mat DhunDh mere chahne walon mein kahin

chahne walon ke atraf khaDa hun main bhi

samne paDte nazar aate hain apne hi qadam

kya sunun KHud ko ki apni hi sada hun main bhi

mujh pe barsana dahakte hue suraj ki tapish

aasman dekh ki ek teri ghaTa hun main bhi

ab kahan jaegi ujDe hue mausam ki bahaar

is KHarabe mein kahin dur khaDa hun main bhi

saneha koi shafaq par chamakne ko hai

qafila-shab ke guzarne ki sada hun main bhi