baad muddat ke ye hua malum

ba.ad muddat ke ye huā ma.alūm

jo hai ma.alūm vo hai nā-ma.alūm

kis ne kho.e haiñ hosh kyā ma.alūm

kaun kāfir hai ye ḳhudā ma.alūm

ham ko manzil kī hai talāsh bahut

go nahīñ us kā rāstā ma.alūm

dil meñ ik dard kī kasak sī thī

ab huī us kī intihā ma.alūm

justajū-e-hazār ke bā-vasf

kuchh huā kuchh nahīñ huā ma.alūm

rāz-e-kaunain usī pe faash nahīñ

jis ne samjhā ki ho gayā ma.alūm

us ko qudrat ne dī girāñ-goshī

jis ko hai saaz kī sadā ma.alūm

dard se vāsta hai dard se kaam

go hai is dard kī davā ma.alūm

'arsh' vo mujh ko chhoḌte hī nahīñ

ab huī jurm kī sazā ma.alūm

baad muddat ke ye hua malum

jo hai malum wo hai na-malum

kis ne khoe hain hosh kya malum

kaun kafir hai ye KHuda malum

hum ko manzil ki hai talash bahut

go nahin us ka rasta malum

dil mein ek dard ki kasak si thi

ab hui us ki intiha malum

justaju-e-hazar ke ba-wasf

kuchh hua kuchh nahin hua malum

raaz-e-kaunain usi pe fash nahin

jis ne samjha ki ho gaya malum

us ko qudrat ne di giran-goshi

jis ko hai saz ki sada malum

dard se wasta hai dard se kaam

go hai is dard ki dawa malum

'arsh' wo mujh ko chhoDte hi nahin

ab hui jurm ki saza malum