baada-e-wahshat-asar se mast virane mein tha

bāda-e-vahshat-asar se mast vīrāne meñ thā

ek aalam be-ḳhudī kā tere dīvāne meñ thā

jalva farmātā vo ka.abe meñ na but-ḳhāne meñ thā

DhūñDhtā thā jis ko maiñ vo dil ke kāshāne meñ thā

hasrateñ thiiñ raqs meñ sāz-e-tarab thī āh-e-dil

aish duniyā-bhar kā mere ek ġham-ḳhāne meñ thā

pūchhtā kyā hai haqīqat us kī mujh se mohtasib

kyā batā.ūñ maiñ tujhe kyā mere paimāne meñ thā

josh-e-vahshat meñ thī us kī justujū donoñ taraf

ik qadam merā thā ghar meñ ek vīrāne meñ thā

har ghaḌī thī jis ke jalve kī nigāhoñ ko talāsh

nuur us kā aañkh meñ vo dil ke kāshāne meñ thā

surḳh Dore aa ga.e piite hī saaqī aañkh meñ

ye mai-e-gul-rañg thī yā ḳhuun paimāne meñ thā

lā sakā ai sham.a dam-bhar bhī na tāb-e-soz-e-ishq

ḳhaak hone ke sivā kyā ḳhaak parvāne meñ thā

aur kyā ka.abe meñ miltā sañg-e-asvad ke sivā

DhūñDhtā thā jis ko tū zāhid vo but-ḳhāne meñ thā

naġhma-e-haq kī sadā har-dam kiye detī thī mast

kis maze kā ik tarannum dil ke paimāne meñ thā

merī rāhat kā zarīya thiiñ mirī āzādiyāñ

vo qadam thā aish-ḳhāne meñ jo vīrāne meñ thā

kauñd kar girtī thiiñ dil par har taraf se bijliyāñ

ik nayā andāz un ke teġh chamkāne meñ thā

chashm-e-haq-bīñ ke liye haiñ ek hī dair-o-haram

saaf ka.abe meñ nazar aayā jo but-ḳhāne meñ thā

ab vo rañg-e-bāda-e-ulfat ilāhī kyā huā

joshish-e-hubb-e-vatan jo dil ke paimāne meñ thā

kyā kahūñ kis shai ne 'raunaq' kar diyā mast-e-alast

thā vo ik rañg-e-mai-e-irfāñ jo paimāne meñ thā

baada-e-wahshat-asar se mast virane mein tha

ek aalam be-KHudi ka tere diwane mein tha

jalwa farmata wo kabe mein na but-KHane mein tha

DhunDhta tha jis ko main wo dil ke kashane mein tha

hasraten thin raqs mein saz-e-tarab thi aah-e-dil

aish duniya-bhar ka mere ek gham-KHane mein tha

puchhta kya hai haqiqat us ki mujh se mohtasib

kya bataun main tujhe kya mere paimane mein tha

josh-e-wahshat mein thi us ki justuju donon taraf

ek qadam mera tha ghar mein ek virane mein tha

har ghaDi thi jis ke jalwe ki nigahon ko talash

nur us ka aankh mein wo dil ke kashane mein tha

surKH Dore aa gae pite hi saqi aankh mein

ye mai-e-gul-rang thi ya KHun paimane mein tha

la saka ai shama dam-bhar bhi na tab-e-soz-e-ishq

KHak hone ke siwa kya KHak parwane mein tha

aur kya kabe mein milta sang-e-aswad ke siwa

DhunDhta tha jis ko tu zahid wo but-KHane mein tha

naghma-e-haq ki sada har-dam kiye deti thi mast

kis maze ka ek tarannum dil ke paimane mein tha

meri rahat ka zariya thin meri aazadiyan

wo qadam tha aish-KHane mein jo virane mein tha

kaund kar girti thin dil par har taraf se bijliyan

ek naya andaz un ke tegh chamkane mein tha

chashm-e-haq-bin ke liye hain ek hi dair-o-haram

saf kabe mein nazar aaya jo but-KHane mein tha

ab wo rang-e-baada-e-ulfat ilahi kya hua

joshish-e-hubb-e-watan jo dil ke paimane mein tha

kya kahun kis shai ne 'raunaq' kar diya mast-e-alast

tha wo ek rang-e-mai-e-irfan jo paimane mein tha