بادہ ہی کہے ہے نہ وہ پیمانہ کہے ہے

بادہ ہی کہے ہے نہ وہ پیمانہ کہے ہے

جو بات تری نرگس مستانہ کہے ہے

ہستی کا بھرم پیار کا نذرانہ کہے ہے

کیا کیا نہ غم عشق کو دیوانہ کہے ہے

یہ شہر تمنا ہے ہر اک چہرہ یہاں کا

سنگ ستم و جور کا افسانہ کہے ہے

گزرا ہے کوئی قافلۂ باد بہاری

مہکی ہوئی خاک رہ ویرانہ کہے ہے

کیا بات ہے دیوانے کے انداز نظر کی

ہر چیز کو عکس رخ جانانہ کہے ہے

کہتے ہیں کہ ناظمؔ روش عام سے ہٹ کر

اس حسن جہاں تاب کا افسانہ کہے ہے