baada hi kahe hai na wo paimana kahe hai

baada hī kahe hai na vo paimāna kahe hai

jo baat tirī nargis-e-mastāna kahe hai

hastī kā bharam pyaar kā nazrāna kahe hai

kyā kyā na ġham-e-ishq ko dīvāna kahe hai

ye shahr-e-tamannā hai har ik chehra yahāñ kā

sang-e-sitam-o-jaur kā afsāna kahe hai

guzrā hai koī qāfila-e-bād-e-bahārī

mahkī huī ḳhāk-e-rah-e-vīrāna kahe hai

kyā baat hai dīvāne ke andāz-e-nazar kī

har chiiz ko aks-e-ruḳh-e-jānāna kahe hai

kahte haiñ ki 'nāzim' ravish-e-ām se haT kar

is husn-e-jahāñ-tāb kā afsāna kahe hai

baada hi kahe hai na wo paimana kahe hai

jo baat teri nargis-e-mastana kahe hai

hasti ka bharam pyar ka nazrana kahe hai

kya kya na gham-e-ishq ko diwana kahe hai

ye shahr-e-tamanna hai har ek chehra yahan ka

sang-e-sitam-o-jaur ka afsana kahe hai

guzra hai koi qafila-e-baad-e-bahaari

mahki hui KHak-e-rah-e-virana kahe hai

kya baat hai diwane ke andaz-e-nazar ki

har chiz ko aks-e-ruKH-e-jaanana kahe hai

kahte hain ki 'nazim' rawish-e-am se haT kar

is husn-e-jahan-tab ka afsana kahe hai