baadal bana raha hun main ashkon ki bhap se

bādal banā rahā huuñ maiñ ashkoñ kī bhaap se

jhagḌā hai nā-guzīr mirā apne aap se

ḳhushiyoñ ke saath mere ravābit haiñ āj-kal

ġham ko kashīd kartā huuñ Dholak kī thaap se

jā.uñgā saare mas.ale virse meñ chhoḌ kar

tarke meñ jo mile haiñ mujhe apne baap se

puurā kiyā hai dil ne unheñ kāñT-chhāñT kar

vo dukh bahut baḌe the kahīñ mere naap se

hāsil vasūl kyā hai ḳhazāne pe baiTh kar

kiilā gayā huuñ maiñ kisī mantar ke jaap se

masraf nikal to aaya hai andar kī aag kā

dil ke phaphole jalne lage haiñ alaap se

sach-much kisī se koī adāvat nahīñ magar

kuchh pun kamā rahā huuñ mohabbat ke paap se

aise hī to maiñ us kā nishāna nahīñ banā

pahchāntā thā vo mujhe qadmoñ kī chaap se

phir lahlahā uThī haiñ tabassum kī khetiyāñ

khilne lage haiñ phuul diloñ ke milāp se

baadal bana raha hun main ashkon ki bhap se

jhagDa hai na-guzir mera apne aap se

KHushiyon ke sath mere rawabit hain aaj-kal

gham ko kashid karta hun Dholak ki thap se

jaunga sare masale wirse mein chhoD kar

tarke mein jo mile hain mujhe apne bap se

pura kiya hai dil ne unhen kanT-chhanT kar

wo dukh bahut baDe the kahin mere nap se

hasil wasul kya hai KHazane pe baiTh kar

kila gaya hun main kisi mantar ke jap se

masraf nikal to aaya hai andar ki aag ka

dil ke phaphole jalne lage hain alap se

sach-much kisi se koi adawat nahin magar

kuchh pun kama raha hun mohabbat ke pap se

aise hi to main us ka nishana nahin bana

pahchanta tha wo mujhe qadmon ki chap se

phir lahlaha uThi hain tabassum ki khetiyan

khilne lage hain phul dilon ke milap se