bagh mein jugnu chamakte hain jo pyare raat ko

baaġh meñ jugnū chamakte haiñ jo pyāre raat ko

yaad aate haiñ un āñkhoñ ke ishāre raat ko

shub.h hai tum ko kahāñ TuuTe haiñ taare raat ko

dam-ba-dam aañsū Tapakte the hamāre raat ko

TuuTe taare saikḌoñ yuuñ qudsiyoñ ke dil hile

dard se jis vaqt ham tum ko pukāre raat ko

puurī gardish āsmāñ ne shaam se kī tā-sahar

aaj maiñ ne gin liye saare sitāre raat ko

dhuup niklī din ko chehre se haTā lī jab naqāb

chāñdnī phailī jahāñ kapḌe utāre raat ko

saaf karvaT lene kī āvāz aa.ī kaan meñ

sū-e-dil jab jhuk ke ham tum ko pukāre raat ko

zarroñ ko shābāsh din ko haiñ huzūr-e-mahr-e-ruḳh

dekhiye chhup ke nikalte haiñ sitāre raat ko

hijr kī muddat na hogī ḳhatm sābit ho chukā

din ko zarre gin chukā maiñ aur taare raat ko

ulfat-e-ruḳh meñ hai vahshat yād-e-gesū meñ bukā

din ko sahrā meñ haiñ dariyā ke kināre raat ko

aa ga.ī sub.h-e-qayāmat aur maiñ soyā nahīñ

phir na aa.ī niiñd tum jab se sidhāre raat ko

dil jigar lene phir aa.e sub.h ko kahte hue

rah ga.e bistar pe do motī hamāre raat ko

muñh pe zulf-e-zar-fishāñ hai mujh se hai rone kā hukm

chāñdnī dekhī hai dariyā ke kināre raat ko

aap ārā.ish bhī karte haiñ muāfiq vaqt ke

din ko muñh dhoyā gayā gesū sañvāre raat ko

DhūñDhte phirte haiñ dil ko sub.h se har-sū 'rashīd'

dil-rubā thā ek pahlū meñ hamāre raat ko

bagh mein jugnu chamakte hain jo pyare raat ko

yaad aate hain un aankhon ke ishaare raat ko

shubh hai tum ko kahan TuTe hain tare raat ko

dam-ba-dam aansu Tapakte the hamare raat ko

TuTe tare saikDon yun qudsiyon ke dil hile

dard se jis waqt hum tum ko pukare raat ko

puri gardish aasman ne sham se ki ta-sahar

aaj main ne gin liye sare sitare raat ko

dhup nikli din ko chehre se haTa li jab naqab

chandni phaili jahan kapDe utare raat ko

saf karwaT lene ki aawaz aai kan mein

su-e-dil jab jhuk ke hum tum ko pukare raat ko

zarron ko shabash din ko hain huzur-e-mahr-e-ruKH

dekhiye chhup ke nikalte hain sitare raat ko

hijr ki muddat na hogi KHatm sabit ho chuka

din ko zarre gin chuka main aur tare raat ko

ulfat-e-ruKH mein hai wahshat yaad-e-gesu mein buka

din ko sahra mein hain dariya ke kinare raat ko

aa gai subh-e-qayamat aur main soya nahin

phir na aai nind tum jab se sidhaare raat ko

dil jigar lene phir aae subh ko kahte hue

rah gae bistar pe do moti hamare raat ko

munh pe zulf-e-zar-fishan hai mujh se hai rone ka hukm

chandni dekhi hai dariya ke kinare raat ko

aap aaraish bhi karte hain muafiq waqt ke

din ko munh dhoya gaya gesu sanware raat ko

DhunDhte phirte hain dil ko subh se har-su 'rashid'

dil-ruba tha ek pahlu mein hamare raat ko