bagh mein kaliyon ka muskana gaya

baaġh meñ kaliyoñ kā muskānā gayā

phuul par titlī kā mañDlānā gayā

be-hunar honā bhī goyā hai hunar

raaz ye tāḳhīr se jaanā gayā

mere dil meñ bhī tapāñ haiñ valvale

kyuuñ mujhe be aarzū maanā gayā

band-e-ġham se ham rihā na ho sake

rā.egāñ sab sab kā samjhānā gayā

haath maltā rah gayā shauq-e-junūñ

toḌ kar zanjīr-e-dil daanā gayā

ho chukī pāmāl qadr-e-bandagī

jab ise kār-e-ziyāñ jaanā gayā

āgahī kī mushkileñ nāguftanī

kyuuñ tujhe had se sivā jaanā gayā

kitne chehre rakhtā hai vo ek shaḳhs

kab 'sahar' tum se vo pahchānā gayā

bagh mein kaliyon ka muskana gaya

phul par titli ka manDlana gaya

be-hunar hona bhi goya hai hunar

raaz ye taKHir se jaana gaya

mere dil mein bhi tapan hain walwale

kyun mujhe be aarzu mana gaya

band-e-gham se hum riha na ho sake

raegan sab sab ka samjhana gaya

hath malta rah gaya shauq-e-junun

toD kar zanjir-e-dil dana gaya

ho chuki pamal qadr-e-bandagi

jab ise kar-e-ziyan jaana gaya

aagahi ki mushkilen naguftani

kyun tujhe had se siwa jaana gaya

kitne chehre rakhta hai wo ek shaKHs

kab 'sahar' tum se wo pahchana gaya