bagh mein phulon ko raund aai sawari aap ki

baaġh meñ phūloñ ko rauñd aa.ī savārī aap kī

kis qadar mamnūn hai bād-e-bahārī aap kī

bevafā.ī aap kī ġhaflat-shi.ārī aap kī

mere dil ne ādateñ sīkhī haiñ saarī aap kī

hai yaqīñ bāham gale milne ko uTTheñ dast-e-shauq

ho agar tasvīr bhī yakjā hamārī aap kī

mai-kade meñ TuuTe jaate haiñ baham laḌ laḌ ke jaam

mufsida-pardāz hai chashm-e-ḳhumārī aap kī

jazb ise kahte haiñ aa.e kahne merī qabr tak

ab yahāñ se baḌh nahīñ saktī savārī aap kī

kartī haiñ andher hāthoñ kī ye kaalī mailiyāñ

qātil-e-ālam huī hai sogvārī aap kī

jā-ba-jā hote haiñ dāman-gīr dil ushshāq ke

har qadam par aaj ruktī hai savārī aap kī

yād-e-ayyāme ki thā zoroñ pe jazb-e-husn-o-ishq

vo mire dil kā taḌapnā be-qarārī aap kī

hai shab-e-mahtāb gore rañg se kapḌe siyāh

husn ko chamkā rahī hai sogvārī aap kī

do tarah ke ek sāġhar meñ labālab hai sharāb

ḳhvāb-ālūda nahīñ chashm-e-ḳhumārī aap kī

mere lāshe ko liye phirte haiñ un rāhoñ meñ log

jin galī-kūchoñ meñ phirtī thī savārī aap kī

aaj kis par rahm aayā kis ko ro.e haiñ huzūr

hai nasīb-e-dushmanāñ āvāz bhārī aap kī

ahd meñ majnūñ ke lailā kā rahā kyā daur daur

ab 'ta.ashshuq' ke zamāne meñ hai baarī aap kī

bagh mein phulon ko raund aai sawari aap ki

kis qadar mamnun hai baad-e-bahaari aap ki

bewafai aap ki ghaflat-shiari aap ki

mere dil ne aadaten sikhi hain sari aap ki

hai yaqin baham gale milne ko uTThen dast-e-shauq

ho agar taswir bhi yakja hamari aap ki

mai-kade mein TuTe jate hain baham laD laD ke jam

mufsida-pardaz hai chashm-e-KHumari aap ki

jazb ise kahte hain aae kahne meri qabr tak

ab yahan se baDh nahin sakti sawari aap ki

karti hain andher hathon ki ye kali mailiyan

qatil-e-alam hui hai sogwari aap ki

ja-ba-ja hote hain daman-gir dil ushshaq ke

har qadam par aaj rukti hai sawari aap ki

yaad-e-ayyame ki tha zoron pe jazb-e-husn-o-ishq

wo mere dil ka taDapna be-qarari aap ki

hai shab-e-mahtab gore rang se kapDe siyah

husn ko chamka rahi hai sogwari aap ki

do tarah ke ek saghar mein labaalab hai sharab

KHwab-aluda nahin chashm-e-KHumari aap ki

mere lashe ko liye phirte hain un rahon mein log

jin gali-kuchon mein phirti thi sawari aap ki

aaj kis par rahm aaya kis ko roe hain huzur

hai nasib-e-dushmanan aawaz bhaari aap ki

ahd mein majnun ke laila ka raha kya daur daur

ab 'tashshuq' ke zamane mein hai bari aap ki