باغ و بستاں ہوئے ویران کہ جی جانتا ہے

باغ و بستاں ہوئے ویران کہ جی جانتا ہے

سر دنیا ہے وہ طوفان کہ جی جانتا ہے

اور کیا اس کے سوا حاصل روداد جہاں

خاک و خوں دست و گریبان کہ جی جانتا ہے

روز محشر تو نہ تھا شام ملاقات تھی وہ

یوں ہوئے بے سر و سامان کہ جی جانتا ہے

ماہ تمثال تھا یا خنجر عریاں کوئی

یوں ہے پیوست رگ جان کہ جی جانتا ہے

درد ہوتا تو سر شام سنبھل بھی جاتا

دل ہے وہ لشکر ارمان کہ جی جانتا ہے

بے سکونی کی طلب ہے نشۂ قلزم جاں

آب ہے تشنۂ ہیجان کہ جی جانتا ہے

طے کہاں ہوتی ہے راہ سفر نا معلوم

غم ہے یوں دیدۂ حیران کہ جی جانتا ہے