bagh pa kar KHafaqani ye Daraata hai mujhe

baaġh pā kar ḳhafaqānī ye Darātā hai mujhe

sāya-e-shāḳh-e-gul af'ī nazar aatā hai mujhe

jauhar-e-teġh ba-sar-chashma-e-dīgar ma.alūm

huuñ maiñ vo sabza ki zahrāb ugātā hai mujhe

mudda'ā mahv-e-tamāshā-e-shikast-e-dil hai

ā.ina-ḳhāna meñ koī liye jaatā hai mujhe

naala sarmāya-e-yak-ālam o aalam kaf-e-ḳhāk

āsmāñ baiza-e-qumrī nazar aatā hai mujhe

zindagī meñ to vo mahfil se uThā dete the

dekhūñ ab mar ga.e par kaun uThātā hai mujhe

baaġh tujh bin gul-e-nargis se Darātā hai mujhe

chāhūñ gar sair-e-chaman aañkh dikhātā hai mujhe

shor-e-timsāl hai kis rashk-e-chaman kā yā rab

aa.ina baiza-e-bulbul nazar aatā hai mujhe

hairat-e-ā.ina anjām-e-junūñ huuñ jyuuñ sham'

kis qadar dāġh-e-jigar sho'la uThātā hai mujhe

maiñ huuñ aur hairat-e-jāved magar zauq-e-ḳhayāl

ba-fusūn-e-nigah-e-nāz satātā hai mujhe

hairat-e-fikr-e-suḳhan sāz-e-salāmat hai 'asad'

dil pas-e-zānū-e-ā.īna biThātā hai mujhe

bagh pa kar KHafaqani ye Daraata hai mujhe

saya-e-shaKH-e-gul af'i nazar aata hai mujhe

jauhar-e-tegh ba-sar-chashma-e-digar malum

hun main wo sabza ki zahrab ugata hai mujhe

mudda'a mahw-e-tamasha-e-shikast-e-dil hai

aaina-KHana mein koi liye jata hai mujhe

nala sarmaya-e-yak-alam o aalam kaf-e-KHak

aasman baiza-e-qumri nazar aata hai mujhe

zindagi mein to wo mahfil se uTha dete the

dekhun ab mar gae par kaun uThata hai mujhe

bagh tujh bin gul-e-nargis se Daraata hai mujhe

chahun gar sair-e-chaman aankh dikhata hai mujhe

shor-e-timsal hai kis rashk-e-chaman ka ya rab

aaina baiza-e-bulbul nazar aata hai mujhe

hairat-e-aina anjam-e-junun hun jyun sham'

kis qadar dagh-e-jigar sho'la uThata hai mujhe

main hun aur hairat-e-jawed magar zauq-e-KHayal

ba-fusun-e-nigah-e-naz satata hai mujhe

hairat-e-fikr-e-suKHan saz-e-salamat hai 'asad'

dil pas-e-zanu-e-aina biThata hai mujhe