bagh sara to bayaban na hua tha so hua

baaġh saarā to bayābāñ na huā thā so huā

jo ḳhizāñ kā kabhī ehsāñ na huā thā so huā

ham to bedār hue ḳhvāb se apne lekin

vo bhī ḳhvāboñ meñ pareshāñ na huā thā so huā

ham bhī kuchh soch ke kar baiThe bil-āḳhir shikva

vo bhī pahle to pashemāñ na huā thā so huā

mish.aleñ sar kī sajā.ī ga.iiñ tasht-e-zar meñ

kab se maqtal meñ charāġhāñ na huā thā so huā

safar-e-jāñ kī huī ab kahīñ jā kar takmīl

ya.anī maiñ be-sar-o-sāmāñ na huā thā so huā

dekhte dekhte aa pahuñchā saroñ tak paanī

ab tak andāza-e-tūfāñ na huā thā so huā

dosto maiñ jo ta.alluq thā vo baaqī na rahā

dushmanoñ meñ koī paimāñ na huā thā so huā

aur kyā mujh ko sila miltā ḳhulūs-e-dil kā

hadaf-e-tohmat-e-yārāñ na huā thā so huā

dasht meñ abr to barsā vo do ik buuñd sahī

pahle itnā bhī to imkāñ na huā thā so huā

'mohsin' achchhā hī huā us ne ulaT dī jo naqāb

rañg us kā jo numāyāñ na huā thā so huā

bagh sara to bayaban na hua tha so hua

jo KHizan ka kabhi ehsan na hua tha so hua

hum to bedar hue KHwab se apne lekin

wo bhi KHwabon mein pareshan na hua tha so hua

hum bhi kuchh soch ke kar baiThe bil-aKHir shikwa

wo bhi pahle to pasheman na hua tha so hua

mishalen sar ki sajai gain tasht-e-zar mein

kab se maqtal mein charaghan na hua tha so hua

safar-e-jaan ki hui ab kahin ja kar takmil

yani main be-sar-o-saman na hua tha so hua

dekhte dekhte aa pahuncha saron tak pani

ab tak andaza-e-tufan na hua tha so hua

dosto main jo talluq tha wo baqi na raha

dushmanon mein koi paiman na hua tha so hua

aur kya mujh ko sila milta KHulus-e-dil ka

hadaf-e-tohmat-e-yaran na hua tha so hua

dasht mein abr to barsa wo do ek bund sahi

pahle itna bhi to imkan na hua tha so hua

'mohsin' achchha hi hua us ne ulaT di jo naqab

rang us ka jo numayan na hua tha so hua