baghban jashn-e-bahaaran nahin hone dete

bāġhbāñ jashn-e-bahārāñ nahīñ hone dete

diip ulfat ke farozāñ nahīñ hone dete

zahr ulfat kā pilāte haiñ baḌe faḳhr ke saath

aap insān ko insāñ nahīñ hone dete

ḳhud-numā.ī meñ kuchh is tarah giraftār haiñ ham

aur logoñ ko numāyāñ nahīñ hone dete

aql ko shoḳhī-e-bātil meñ phañsāne vaale

qalb ko sāhib-e-īmāñ nahīñ hone dete

ġham se nisbat hai jinheñ zabt-e-alam karte haiñ

ashk ko zīnat-e-dāmāñ nahīñ hone dete

rūh-e-afkār ko me.aar atā karte haiñ

ham ḳhayālāt ko uryāñ nahīñ hone dete

chand lamhe vo mire sāmne rah kar 'abrār'

chashm-e-betāb ko hairāñ nahīñ hone dete

baghban jashn-e-bahaaran nahin hone dete

dip ulfat ke farozan nahin hone dete

zahr ulfat ka pilate hain baDe faKHr ke sath

aap insan ko insan nahin hone dete

KHud-numai mein kuchh is tarah giraftar hain hum

aur logon ko numayan nahin hone dete

aql ko shoKHi-e-baatil mein phansane wale

qalb ko sahib-e-iman nahin hone dete

gham se nisbat hai jinhen zabt-e-alam karte hain

ashk ko zinat-e-daman nahin hone dete

ruh-e-afkar ko mear ata karte hain

hum KHayalat ko uryan nahin hone dete

chand lamhe wo mere samne rah kar 'abrar'

chashm-e-betab ko hairan nahin hone dete