baghban ne jaan rakh li bulbul-e-nashad ki

bāġhbāñ ne jaan rakh lī bulbul-e-nāshād kī

dast-e-gul-chīñ toḌ Daalā Taañg lī sayyād kī

shā.iro shān-e-ḳhudā hai tiir mizhgāñ ho ga.e

baaḌh abrū meñ hai paidā ḳhanjar-e-jallād kī

ishq-e-zālim kī koī dekhe karishma-sāziyāñ

jā ke majnūñ ko satāyā lī ḳhabar farhād kī

jhuuT kī had hai koī zer-o-zabar aalam huā

āsmāñ bhī phaT paḌā āshiq ne jab fariyād kī

nāma-bar se pūchhtā hai haal naama phaaḌ kar

dekhiye to chheḌ sāhab us sitam-ījād kī

us ko aur tum se mohabbat haañ ḳhudā kī shaan hai

kyoñ adū kambaḳht khātā hai qasam aulād kī

khīñchtā tasvīr kyūñkar dekh kar rob-e-jamāl

haath kāñpā mar ga.ī naanī vahīñ bahzād kī

furqat-e-jānāñ meñ siina ho gayā chhattīs inch

lāġharī dekhe to koī āshiq-e-nāshād kī

baghban ne jaan rakh li bulbul-e-nashad ki

dast-e-gul-chin toD Dala Tang li sayyaad ki

shairo shan-e-KHuda hai tir mizhgan ho gae

baDh abru mein hai paida KHanjar-e-jallad ki

ishq-e-zalim ki koi dekhe karishma-saziyan

ja ke majnun ko sataya li KHabar farhad ki

jhuT ki had hai koi zer-o-zabar aalam hua

aasman bhi phaT paDa aashiq ne jab fariyaad ki

nama-bar se puchhta hai haal nama phaD kar

dekhiye to chheD sahab us sitam-ijad ki

us ko aur tum se mohabbat han KHuda ki shan hai

kyon adu kambaKHt khata hai qasam aulad ki

khinchta taswir kyunkar dekh kar rob-e-jamal

hath kanpa mar gai nani wahin bahzad ki

furqat-e-jaanan mein sina ho gaya chhattis inch

laghari dekhe to koi aashiq-e-nashad ki