bahar jo uD rahi hai ye andar ki ret hai

bāhar jo uḌ rahī hai ye andar kī ret hai

āñkhoñ meñ bikhre ḳhvāb ke manzar kī ret hai

maiñ pyaas kā taqāzā karūñ kis zabān se

sahrā ke paas mere samundar kī ret hai

āñkhoñ meñ baiTh jaa.e to uḌtī nahīñ kabhī

ye aas kis chaTān ke patthar kī ret hai

malba na bole koī bhī ḳhvāboñ kī gard ko

ye dasht-e-be-karāñ ke barābar kī ret hai

uḌtī rahegī chāroñ taraf shor kī tarah

ye ḳhāmushī bhī ek bavanDar kī ret hai

nafrat kī iiñT khokhle gaare se mat banā

dīvār jāntī hai ye kankar kī ret hai

jis ko sameTne meñ dhañsiī jā rahī huuñ maiñ

ik haath se phisalte hue ghar kī ret hai

qurbāniyoñ ke faiz se ḳhāk-e-shifā banī

maidān-e-karbalā meñ bahattar kī ret hai

bahar jo uD rahi hai ye andar ki ret hai

aankhon mein bikhre KHwab ke manzar ki ret hai

main pyas ka taqaza karun kis zaban se

sahra ke pas mere samundar ki ret hai

aankhon mein baiTh jae to uDti nahin kabhi

ye aas kis chaTan ke patthar ki ret hai

malba na bole koi bhi KHwabon ki gard ko

ye dasht-e-be-karan ke barabar ki ret hai

uDti rahegi chaaron taraf shor ki tarah

ye KHamushi bhi ek bawanDar ki ret hai

nafrat ki inT khokhle gare se mat bana

diwar jaanti hai ye kankar ki ret hai

jis ko sameTne mein dhansii ja rahi hun main

ek hath se phisalte hue ghar ki ret hai

qurbaniyon ke faiz se KHak-e-shifa bani

maidan-e-karbala mein bahattar ki ret hai