باہر تو خوش گوار دسمبر کی دھوپ ہے

باہر تو خوش گوار دسمبر کی دھوپ ہے

ہم جس میں جل رہے ہیں وہ اندر کی دھوپ ہے

کیا دھوپ کے غضب سے ڈراؤگے تم مجھے

ہر چلچلاتی دھوپ مرے گھر کی دھوپ ہے

اس سے تو زلف بھی نہ بچا پائے گی تری

اے مہرباں یہ میرے مقدر کی دھوپ ہے

گرتی ہے مجھ پہ آ کے کسی تیغ کی طرح

خود کو بچا کے رکھ یہ مرے سر کی دھوپ ہے

تیری حسین شام کو جھلسا نہ دے کہیں

مجھ بے نوا کے ساتھ جو دن بھر کی دھوپ ہے

مایوس لوٹ جائے گی درویشؔ کی طرح

کمرے میں جھانکتی ہوئی باہر کی دھوپ ہے