bahar to KHush-gawar december ki dhup hai

bāhar to ḳhush-gavār december kī dhuup hai

ham jis meñ jal rahe haiñ vo andar kī dhuup hai

kyā dhuup ke ġhazab se Darāoge tum mujhe

har chilchilātī dhuup mire ghar kī dhuup hai

is se to zulf bhī na bachā pā.egī tirī

ai mehrbāñ ye mere muqaddar kī dhuup hai

girtī hai mujh pe aa ke kisī teġh kī tarah

ḳhud ko bachā ke rakh ye mire sar kī dhuup hai

terī hasīn shaam ko jhulsā na de kahīñ

mujh be-navā ke saath jo din bhar kī dhuup hai

māyūs lauT jā.egī 'darvesh' kī tarah

kamre meñ jhāñktī huī bāhar kī dhuup hai

bahar to KHush-gawar december ki dhup hai

hum jis mein jal rahe hain wo andar ki dhup hai

kya dhup ke ghazab se Daraoge tum mujhe

har chilchilati dhup mere ghar ki dhup hai

is se to zulf bhi na bacha paegi teri

ai mehrban ye mere muqaddar ki dhup hai

girti hai mujh pe aa ke kisi tegh ki tarah

KHud ko bacha ke rakh ye mere sar ki dhup hai

teri hasin sham ko jhulsa na de kahin

mujh be-nawa ke sath jo din bhar ki dhup hai

mayus lauT jaegi 'darwesh' ki tarah

kamre mein jhankti hui bahar ki dhup hai