baal-o-par rakhte nahin azm-e-safar rakhte hain

bāl-o-par rakhte nahīñ azm-e-safar rakhte haiñ

shauq-e-parvāz ba-andāz-e-digar rakhte haiñ

haath uThāne kī koī shart duā meñ kab hai

tere ushshāq nigāhoñ meñ asar rakhte haiñ

bil-irāda na sahī yuuñ hī kabhī aa jaao

pyaar ke raste meñ ham chhoTā sā ghar rakhte haiñ

ye alag baat ki aate haiñ nazar zarra-sifat

varna qadmoñ meñ to ham shams-o-qamar rakhte haiñ

dhuup hai ret hai aur apnā safar hai jaarī

saaya rakhte haiñ na ham log shajar rakhte haiñ

us taraf vaale nazar aate haiñ larzīda magar

is taraf vaale kaf-e-dast pe sar rakhte haiñ

pur-sukūñ hai jo fazā us pe na jaanā 'anjum'

āshiyāñ kitne abhī barq-o-sharar rakhte haiñ

baal-o-par rakhte nahin azm-e-safar rakhte hain

shauq-e-parwaz ba-andaz-e-digar rakhte hain

hath uThane ki koi shart dua mein kab hai

tere ushshaq nigahon mein asar rakhte hain

bil-irada na sahi yun hi kabhi aa jao

pyar ke raste mein hum chhoTa sa ghar rakhte hain

ye alag baat ki aate hain nazar zarra-sifat

warna qadmon mein to hum shams-o-qamar rakhte hain

dhup hai ret hai aur apna safar hai jari

saya rakhte hain na hum log shajar rakhte hain

us taraf wale nazar aate hain larzida magar

is taraf wale kaf-e-dast pe sar rakhte hain

pur-sukun hai jo faza us pe na jaana 'anjum'

aashiyan kitne abhi barq-o-sharar rakhte hain