baam par aao kabhi mah-e-daraKHshan ki tarah

baam par aao kabhī māh-e-daraḳhshāñ kī tarah

chhup ke kyā jalnā charāġh-e-tah-e-dāmāñ kī tarah

umr bhar vo dar-o-dīvār ke pāband rahe

ghar se nikle hī nahīñ haiñ mire armāñ kī tarah

ab use dekhūñ to pahchān bhī shāyad na sakūñ

dil mirā TuuT gayā yaar ke paimāñ kī tarah

dasht kī raah to lī ālam-e-vahshat meñ magar

dasht bhī niklā mire ḳhāna-e-vīrāñ kī tarah

qais ko dekhā thā maiñ ne sar-e-sahrā ik din

sar se pā tak thā faqat dīda-e-hairāñ kī tarah

nasha-e-mai ho ki husn-e-ruḳh-e-jānāñ 'ārif'

sar chaḌhānā na kisī ko kabhī ehsāñ kī tarah

baam par aao kabhi mah-e-daraKHshan ki tarah

chhup ke kya jalna charagh-e-tah-e-daman ki tarah

umr bhar wo dar-o-diwar ke paband rahe

ghar se nikle hi nahin hain mere arman ki tarah

ab use dekhun to pahchan bhi shayad na sakun

dil mera TuT gaya yar ke paiman ki tarah

dasht ki rah to li aalam-e-wahshat mein magar

dasht bhi nikla mere KHana-e-viran ki tarah

qais ko dekha tha main ne sar-e-sahra ek din

sar se pa tak tha faqat dida-e-hairan ki tarah

nasha-e-mai ho ki husn-e-ruKH-e-jaanan 'arif'

sar chaDhana na kisi ko kabhi ehsan ki tarah