baam par yar ka chehra dekha

baam par yaar kā chehra dekhā

tuur par nuur kā sho.alā dekhā

dil meñ duniyā kā tamāshā dekhā

maujzan kuuze meñ dariyā dekhā

dekh us rū-e-tilā.ī par ḳhat

ho na kundan pe jo miinā dekhā

aah naale se na niklā kuchh kaam

āsmāñ tak use pahuñchā dekhā

qāsid itnā hī tū kah de mujh se

ḳhat ko paḌhvā ke sunā yā dekhā

rahtā hai mujh hī se TeḌhā vo sarv

varna sab se use sīdhā dekhā

raah meñ kal vo yakāyak jo milā

merī jānib ko na aslā dekhā

arz kī maiñ ne idhar to dekho

kahā muñh pher ke dekhā dekhā

jis ne dekhā dahan-e-jānāñ ko

'bāqī' anqā ko hai goyā dekhā

baam par yar ka chehra dekha

tur par nur ka shoala dekha

dil mein duniya ka tamasha dekha

maujzan kuze mein dariya dekha

dekh us ru-e-tilai par KHat

ho na kundan pe jo mina dekha

aah nale se na nikla kuchh kaam

aasman tak use pahuncha dekha

qasid itna hi tu kah de mujh se

KHat ko paDhwa ke suna ya dekha

rahta hai mujh hi se TeDha wo sarw

warna sab se use sidha dekha

rah mein kal wo yakayak jo mila

meri jaanib ko na asla dekha

arz ki main ne idhar to dekho

kaha munh pher ke dekha dekha

jis ne dekha dahan-e-jaanan ko

'baqi' anqa ko hai goya dekha