بانیٔ بیداد بھی تم تم ستم ایجاد بھی

بانیٔ بیداد بھی تم تم ستم ایجاد بھی

سب گوارا ہے اگر سن لو مری فریاد بھی

اس قدر بڑھتا چلا جاتا ہے دل کا اضطراب

باعث راحت نہیں ہے اب تمہاری یاد بھی

اور ہوں گے جن کو شکوہ ہے تری بیداد کا

ہم وہ ہیں جن کو غنیمت ہے تری بیداد بھی

حسن سیرت ہی اک ایسا حسن اس دنیا میں ہے

دیکھ سکتا ہے جسے ہر کور مادر زاد بھی

اک وہ آنسو جو سر مژگاں نکل کر آ گیا

عشق کی تفسیر بھی ہے حسن کی روداد بھی

میں نے دونوں سے نباہی اس طرح ہنس بول کر

باغباں بھی یاد کرتا ہے مجھے صیاد بھی

مٹ چکی تھی ایک مدت سے تمہاری آرزو

رفتہ رفتہ مٹ رہی ہے اب تمہاری یاد بھی

ہم نے اس خوبی سے لکھا ہے فسانہ عشق کا

لوگ کہتے ہیں اسی کو حسن کی روداد بھی

اک فقط دانے کی خاطر کون ہوتا ہے اسیر

ہم کو تھا کچھ احترام کوشش صیاد بھی

تیری خاطر یہ بھی ساحرؔ نے گوارا کر لیا

ورنہ ہوتا ہے خوشی سے کیا کوئی برباد بھی